مەن حالىقتىڭ بولاشاقتا ەمەس، قازىر باقىتتى بولعانىن قالايمىن - نۇرسۇلتان نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ «نۇر وتان» پارتياسىنىڭ جاڭا باعدارلاماسىن شۇعىل ورىنداۋدى تاپسىردى، دەپ حابارلايدى قازاقپارات ءتىلشىسى.

«نۇر وتان» - تولاعاي تابىستاردىڭ جانە بولاشاققا جول اشاتىن جارقىن جەتىستىكتەردىڭ پارتياسى. ءبىزدىڭ ۇزاق مەرزىمدى ستراتەگيامىز، مول تابيعي رەسۋرسىمىز، ساياسي كۇش-جىگەرىمىز بار. مەملەكەتتىڭ قۋاتتىلىعى مەن ەكونوميكانىڭ دامۋ قارقىنى ازاماتتاردىڭ تۇرمىس ساپاسىمەن ولشەنەدى. سوندىقتان مەن وزىمە سەنىم ارتقان حالىقتىڭ بولاشاقتا ەمەس، قازىر باقىتتى بولعانىن كورگىم كەلەدى»، - دەدى ن. نازاربايەۆ «نۇر وتان» پارتياسىنىڭ XVIII سەزىندە.

پرەزيدەنتتىڭ ايتۋىنشا، ءبىزدىڭ ۇستانىمىمىز - تاتۋلىق پەن تىنىشتىق، ال ۇرانىمىز - بەرەكە مەن بىرلىك. «تاۋەلسىز قازاقستاننىڭ ارقا سۇيەيتىن تىرەگى - باياندى بەيبىتشىلىك پەن كەلەلى كەلىسىم! باس پارتيا بولۋ دەگەنىمىز - باسقارۋ ەمەس، ەلگە ادال قىزمەت ەتۋ! ءبىز - حالىق بىرلىگىنىڭ پارتياسىمىز. بۇگىنگى سەزد قازاقستاندى دامىتۋدىڭ جاڭا كەزەڭىنە جول اشادى. ەل تاۋەلسىزدىگىنىڭ 30 جىلدىعى جاقىنداپ كەلە جاتىر. باۋىرىمىز ءبۇتىن بولىپ، سول مەرەكەگە مول تابىسپەن جەتە بەرەيىك! قازىردەن باستاپ دايىندالايىق»، - دەپ اتاپ كورسەتتى ن. نازاربايەۆ.