ۇكىمەتتىڭ ءاربىر مۇشەسى ايتىلعان ماقسات- مىندەتتەرگە جاۋاپتى بولادى - ەلباسى

استانا. قازاقپارات - مەملەكەت باسشىسى نۇرسۇلتان نازاربايەۆ «نۇر وتان» پارتياسىنىڭ جاڭا باعدارلاماسىن شۇعىل ورىنداۋدى تاپسىردى، دەپ حابارلايدى قازاقپارات ءتىلشىسى.

پرەزيدەنتتىڭ ايتۋىنشا، «نۇر وتان» پارتياسىنىڭ جاڭا باعدارلاماسىندا ناقتى ماقسات- مىندەتتەر ايقىندالعان. سونىڭ نەگىزىندە الداعى ءۇش جىلدىڭ مەملەكەتتىك- الەۋمەتتىك ساياساتى جۇرگىزىلەدى. «ۇكىمەتتىڭ جاڭا قۇرامى جانە بارلىق اكىمدەر اتالعان ماقسات- مىندەتتەردى ورىنداۋعا شۇعىل كىرىسۋلەرى كەرەك. وسى ايتىلعان ماسەلەلەرى ءبارىمىز قولعا الىپ، مەن بولىپ، ۇكىمەت بولىپ، پارتيا مۇشەلەرى بولىپ، ايماقتاعى پارتيانىڭ ۇيىمدارى بولىپ، اتسالىسۋىمىز قاجەت. بۇل وڭاي جۇمىس ەمەس، ارينە. بارلىعىن ۇيىمداستىرۋ قاجەت»، - دەدى ن. نازاربايەۆ «نۇر وتان» پارتياسىنىڭ XVIII سەزىندە.

 پرەزيدەنتتىڭ ايتۋىنشا، ۇكىمەتتىڭ ءاربىر مۇشەسى جانە اكىمدەر جاڭا باعدارلامادا كورسەتىلگەن ەكونوميكالىق ماقسات- مىندەتتەردىڭ ورىندالۋىنا جاۋاپتى بولادى. ءارقايسىسىنىڭ جەكە جاۋاپكەرشىلىگى بولادى. «ول ءۇشىن پرەزيدەنت اپپاراتىندا ارنايى باقىلاۋ كوميتەتى قۇرىلادى»، - دەپ اتاپ كورسەتتى ن. نازاربايەۆ.

 ايتا كەتەيىك، بۇگىن مەملەكەت باسشىسى نۇرسۇلتان نازاربايەۆ كوپبالالى وتباسىلاردا ءاربىر بالانىڭ تولەماقىسىن 21 مىڭ تەڭگەگە دەيىن ارتتىرۋدى تاپسىردى. بۇدان بولەك، مۇگەدەك بالالاردى اسىراپ وتىرعان وتباسىلاردىڭ جاردەماقىسى 30 پروتسەنتكە وسەدى. اكىمدىك قىزمەتكەرلەرىنىڭ جالاقىسى دا كوتەرىلەدى. پرەزيدەنتتىڭ «نۇر وتان» پارتياسىنىڭ XVIII سەزىندە سويلەگەن ءسوزىن مىنا جەردەن وقۋعا بولادى.

اۆتور: ارمان اسقاروۆ