ەلباسى: اكىمدەر ەسەبى فورمالدىلىققا اينالىپ كەتكەن
«بىزدە وڭىرلىك دامۋدا ايتارلىقتاي ايىرماشىلىق بار. نەگە ءبىر وبلىستىڭ جولى جاقسى، ال ەكىنشىسىندە ناشار؟ ءبىر جەردە تۇرعىن ءۇي-كوممۋنالدىق شارۋاشىلىق تۇراقتى بولسا، ەندى ءبىر جەرلەردە ىركىلىس ورىن الۋدا؟ دەمەك، شىنىمەن جۇمىس ىستەيتىن، ادامداردىڭ پروبلەماسىن بىلەتىن جانە شەشەتىن اكىمدەر بار دەگەن ءسوز. دەگەنمەن، حالىقپەن تىلدەسۋدەن قاشاتىن جانە ءوڭىر تۇرعىندارىنىڭ شىنايى قاجەتتىلىكتەرىن قاپەرگە المايتىندار دا بار»، - دەدى ەلباسى.
وسى رەتتە مەملەكەت باسشىسى ءوڭىر اكىمدەرى حالىققا جاقىن بولۋى جانە ولاردىڭ يگىلىگى ءۇشىن بارلىعىن جاساۋى قاجەتتىگىن باسا ايتتى.
«ارينە، ولار جۇمىس ىستەپ جاتىر. جۇمىس ىستەمەيدى دەپ ايتا المايمىن. ءبىراق، حالىققا جاقىن بولۋى كەرەك. قازىر بىزدە اكىم جىلىنا ءبىر رەت ەسەپ بەرەتىن ءتارتىپ بار. الايدا، ول فورمالدىلىققا اينالىپ كەتتى. اكىمدەر جىلىنا ءبىر رەت ەمەس، جىل بويى حالىقتىڭ ءتۇرلى ساناتتارى: دارىگەرلەرمەن، مۇعالىمدەرمەن، جاستارمەن كەزدەسۋى ءتيىس. بىزدە ءتۇرلى باعدارلامالار بار، جەتكىلىكتى رەسۋرس تا بولىنگەن. ءبىراق، ناقتى ناتيجەلەر كورىنبەيدى. ەشكىم تۇسىندىرمەيدى. مۇندايعا جول بەرىلمەۋى ءتيىس»، - دەدى ن. نازاربايەۆ.