اۋىز سۋمەن قامتۋعا جانە گازداندىرۋعا ءتيىستى قاراجات بولىنەدى - پرەزيدەنت

استانا. قازاقپارات - قازاقستاننىڭ بۇكىل حالقىن تازا اۋىز سۋمەن قامتۋعا جانە جاپپاي گازداندىرۋ جۇمىستارىنا باسىمدىق بەرىلەدى، دەپ حابارلايدى قازاقپارات ءتىلشىسى.

بۇل تۋرالى قازاقستان رەسپۋبليكاسىنىڭ پرەزيدەنتى، «نۇر وتان» پارتياسىنىڭ ءتوراعاسى نۇرسۇلتان نازاربايەۆ «نۇر وتان» پارتياسىنىڭ كەزەكتى XVIII سەزىندە مالىمدەدى.

«حالىقتى تازا اۋىز سۋمەن قامتۋ جانە جاپپاي گازداندىرۋ - ماڭىزدى باسىمدىق بولىپ قالا بەرەدى. ەلدىمەكەندەرگە سۋ تارتۋ جانە سۋمەن قامتاماسىز ەتۋ جۇمىستارىنا قوسىمشا 140 ميلليارد تەڭگە ءبولۋدى تاپسىرامىن. بۇل قاراجاتتى وبلىستار الىپ، جۇمىسقا كىرىسۋى كەرەك. بۇل شەشىم وسى سالاداعى 2,2 ميلليون ازاماتتىڭ ماسەلەسىن شەشەدى»، - دەدى پرەزيدەنت.

سونىمەن بىرگە، ەلباسى گازداندىرۋ جانە ەلەكتر قۋاتىمەن قامتۋ ءۇشىن 140 ميلليارد تەڭگە ءبولۋدى تاپسىردى. بۇل شارالار 1,1 ميلليون ادامدى گازبەن قامتۋعا مۇمكىندىك بەرەدى جانە وڭىرلىك ەنەرگيامەن قامتۋ الەۋەتىن ارتتىرادى.

«بۇل ماقساتتار ءۇشىن ۇكىمەتكە 2019-2021-جىلدار ارالىعىندا 920 ميلليارد تەڭگە قاراستىرۋدى تاپسىرامىن»، - دەدى نۇرسۇلتان نازاربايەۆ.

ايتا كەتەيىك، ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى ءوتىپ جاتىر.