ءۇش تىلدىلىكتى ەنگىزۋ اقىلعا قونىمدى جۇرگىزىلۋى ءتيىس - ەلباسى
«ءبىلىم سالاسىنداعى رەفورمانى دا لوگيكالىق ناتيجەلەرگە دەيىن جەتكىزۋ قاجەت. قازىرگى زامانعى شىندىق ءبىزدىڭ بالالارىمىزدا جاڭا داعدىلار مەن قۇزىرەتتەردى دامىتۋدى تالاپ ەتەدى. مەن ءۇش تىلدىلىك بىرتىندەپ نورماعا اينالۋى تيىستىگىن ايتقان بولاتىنمىن. ءبىزدىڭ بالالارىمىز - ولار جاھان بالالارى. ولار بۇكىل الەمدىك كەڭىستىكتە، ۇزدىك جوعارى وقۋ ورىندارىندا ءبىلىم الۋدا. سوندىقتان قازاق، ورىس جانە حالىقارالىق اعىلشىن ءتىلىن ءبىلۋ ماڭىزدى»، - دەدى مەملەكەت باسشىسى «نۇر وتان» پارتياسىنىڭ XVIII سەزىندە..
ءبىراق، ەلباسى مۇنى اسىعىس جۇرگىزبەۋ قاجەتتىگىن ەسكەرتتى.
«الدىمەن پەداگوگتەردى دايىنداپ الۋ قاجەت. اعىلشىن ءتىلىن بىلەتىن فيزيكا، ماتەماتيكا جانە حيميادان ساباق بەرۋگە قابىلەتتى پەداگوگتى قانشاما وقىتۋ قاجەت. ال ءبىزدىڭ مينيسترلىك ەرتەڭنەن باستاپ- اق مۇعالىمدەرگە ساباق بەرە باستاۋدى تاپسىردى. ءۇش ايعا كۋرسقا شاقىرىپ، وقىتاسىڭدار. الايدا كىم ءۇش ايدىڭ ىشىندە ماتەماتيكانى اعىلشىن تىلىندە ۇيرەتە الادى؟ بۇعان قوسا، مول قاراجات تا جۇمسالدى. شەتەلدەن مۇعالىمدەردى شاقىرىپ، ساباق بەرۋدى باستاعان جەڭىلىرەك بولار ما ەدى. سوندىقتان بۇل ماقسات پەن مىندەت قالا بەرەدى جانە مينيسترلىك بۇل تۇرعىدا دا دۇرىس باعىتتا دا بولدى. جوعارى وقۋ ورىندارىنا قاتىستى دا دۇرىس ساياسات جۇرگىزە الدى. ءبىراق، مۇنىڭ بارلىعى اقىلعا قونىمدى بولۋى ءارى ادامدارعا نەلىكتەن، قاجەت ەكەندىگى ءتۇسىندىرىلۋى ءتيىس ەدى»، - دەدى نۇرسۇلتان نازاربايەۆ.
اۆتور: مارلان جيەمباي