پرەزيدەنت كەدەندىك اكىمشىلىكتى قاتاڭ باقىلاۋعا الۋدى تاپسىردى

استانا. قازاقپارات - پرەزيدەنت نۇرسۇلتان نازاربايەۆ كەدەندىك اكىمشىلىكتى قاتاڭ باقىلاۋعا الۋدى تاپسىردى، دەپ حابارلايدى قازاقپارات ءتىلشىسى.

«مەن ايتقان جوبالارعا قاراجات سالىق اكىمشىلىگىن تۇبەگەيلى جاقسارتۋدىڭ ەسەبىنەن ءتۇسۋى كەرەك. ماسەلەن، كەدەندىك اكىمشىلىك بويىنشا بىزدە ءبىر مالىمەت بار دا، قىتاي تاراپىندا ودان بولەك ەكىنشى مالىمەت ايتىلىپ جاتادى. ول كورسەتكىشتەردىڭ اراسىندا ميللياردتار جاتىر. ەشكىم دە ەشتەڭە بىلمەيدى. سۇراساڭ، قايداعى ءبىر باستىقتار كەدەندى ۇستاپ تۇر دەيدى. قايداعى باستىقتار؟ ماعان ولاردىڭ كىم ەكەنىن اتاڭدارشى. ولاردى ۇستاپ، قىلمىستىق جاۋاپكەرشىلىككە تارتىڭدار. ول جاقتاعى جۇمىستى رەتكە كەلتىرە وتىرىپ، ءبىز بىرنەشە ءجۇز ميلليارد تەڭگە الا الامىز. سول سەكىلدى، باسقا بيۋجەتتىك شىعىنداردى قىسقارتۋ كەرەك بولار. مەملەكەتتىك ساتىلىمعا 4 تريلليون تەڭگە كەتىپ جاتىر. ءبارى دە ءبىر جەردەن بەرىلۋدە. وسى باعىتتا جۇمىستى رەتتەي باستاپ ەدىك، قاراجات تۇسە باستادى. مەملەكەتتىك ساتىلىمدى تولىعىمەن باسەكەلى ورتاعا بەرۋىمىز كەرەك. قىمبات ءارى جايسىز نىسانداردى قارجىلاندىرۋدى قويۋ كەرەك. بيۋجەتتى قۇرار كەزدە «جوبالىق-سمەتالىق قۇجاتىم بار، ماعان اقشا بەر» دەيدى»، - دەدى نۇرسۇلتان نازاربايەۆ «نۇر وتان» پارتياسىنىڭ كەزەكتى XVIII سەزىندە.

پرەزيدەنت ءوز سوزىندە ۇكىمەت پەن قارجى مينيسترلىگىنە سالىق اكىمشىلىگىن جاقسارتۋ باعىتىندا تاپسىرما بەردى.

«وسى شارالار الداعى 3 جىلدا بيۋجەتكە 1 تريلليون تەڭگە الىپ كەلەدى. سونىمەن بىرگە، ۇلتتىق قوردان تاعى 1 تريلليون 230 ميلليارد بولەمىز. 2 تريلليون 230 ميلليارد - «نۇر وتان» پارتياسى وزىڭىزگە ءتۇرتىپ الىڭىز. ءاربىر تيىن حالىققا جەتۋىن قامتاماسىز ەتەيىك»، - دەدى ەلباسى.

ەسكە سالا كەتسەك، ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى ءوتىپ جاتىر. سەزدىڭ كۇن تارتىبىندە بىرنەشە ماسەلەنى قاراستىرۋ كوزدەلگەن. اتاپ ايتقاندا، الدىمەن «نۇر وتان» پارتياسىنىڭ 2030-جىلعا دەيىنگى باعدارلاماسى تۋرالى ماسەلە قوزعالادى. ودان كەيىن پارتيانىڭ جارعىسىنا وزگەرىستەر مەن تولىقتىرۋلار قاراستىرىلىپ، پارتيا ساياسي كەڭەسىنىڭ جانە ورتالىق باقىلاۋ-تەكسەرۋ كوميسسياسىنىڭ ەسەپتى كەزەڭ بويىنشا جۇمىسىنىڭ قورىتىندىلارى شىعارىلادى. سونىمەن قاتار پارتيا ساياسي كەڭەسىنىڭ جانە ورتالىق باقىلاۋ-تەكسەرۋ كوميسسياسىنىڭ مۇشەلەرى سايلاناتىن بولادى.

سەزد جۇمىسىنا 2 مىڭعا جۋىق ادام قاتىسۋدا. ولاردىڭ 1200 ءى ەلىمىزدىڭ بارلىق وڭىرلەرىنەن كەلگەن دەلەگاتتار، ال قالعان 800 گە جۋىعى - قوناقتار.