اۋىل حالقىنىڭ جاعدايىن جاقسارتۋعا «قۇتتى مەكەن» جوباسى مۇمكىندىك بەرەدى

استانا. قازاقپارات - قازاقستان رەسپۋبليكاسىنىڭ پرەزيدەنتى، «نۇر وتان» پارتياسىنىڭ ءتوراعاسى نۇرسۇلتان نازاربايەۆ پارتياعا «قۇتتى مەكەن» جوباسىن ىسكە اسىرۋدى تاپسىردى، دەپ حابارلايدى قازاقپارات.

«نۇر وتان» پارتياسى ەلىمىزدەگى ينجەنەرلىك- الەۋمەتتىك ينفراقۇرىلىمدى دامىتۋعا باعىتتالعان «قۇتتى مەكەن» پارتيالىق جوباسىن ىسكە قوسۋى كەرەك. وسىلايشا 7,5 ميلليون اۋىل تۇرعىندارىنىڭ جاعدايىن جاقسارتۋ مۇمكىندىگى تۋادى. ەڭ الدىمەن ۇكىمەت اكىمدەرمەن جانە ماسليحاتتارمەن بىرىگىپ، كەلەشەگى بار اۋىلداردى ىرىكتەپ، الەۋمەتتىك نىساندار مەن ينتەرناتتار تۇرعىزۋ جۇمىستارىن جۇرگىزۋى كەرەك»، - دەدى پرەزيدەنت استانادا «نۇر وتان» پارتياسىنىڭ كەزەكتى XVIII سەزىندە.

ەلباسى احمەتجان ەسىموۆتىڭ اۋىل شارۋاشىلىعى ءمينيسترى بولعان جىلدارى جۇرگىزىلگەن تاجىريبەنى ەسكە سالدى.

«7 مىڭنان استام اۋىلدى ءۇش توپقا ءبولىپ قاراستىردىق. حالىق سانى كوپ، ورتالىقتاعى اۋىلداردى ءارى قاراي دامىتىپ، جاعدايى ورتاشا اۋىلدارعا كومەكتەسۋ كەرەك. سوسىن كىشىگىرىم اۋىلدار بار. 10-20 ءۇيى بار اۋىلدارعا اۋرۋحانا، مەكتەپ سالۋدىڭ قاجەتى جوق. سوندىقتان، اۋدان ورتالىقتارىنىڭ ينفراقۇرىلىمىن جاقسارتۋ كەزىندە بىردەن ينتەرناتتار  (جاتىپ وقيتىن تۇراعى بار مەكتەپتەر) تۇرعىزۋ كەرەك. سەبەبى بالالار ساپالى ءبىلىم، ساپالى مەديتسيناسى بار جەردە ءوسۋى ءتيىس. اۋىلدارمەن وسىنداي ءتاسىل ارقىلى جۇمىس ىستەۋى قاجەت»، - دەپ تولىقتىردى ءسوزىن ن. نازاربايەۆ.

ايتا كەتەيىك، ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى ءوتىپ جاتىر.

سەزد «نۇر وتان» پارتياسىنىڭ 20 -جىلدىعىنا وراي ۇيىمداستىرىلىپ وتىر. وندا بىرنەشە ماسەلەنى قاراستىرۋ كوزدەلگەن.

اۆتور: ايجان سەرىكجان قىزى