ءۇندى ەلى مەن پاكىستاننىڭ اراقاتىناسى ۋشىعىپ بارادى
ۇشاقتاردىڭ ءارقايسىسى ءبىر توننالىق بىرنەشە جارىلعىشتى كوكتەن تاستاعان. سالدارىنان لاگەردىڭ كۇلى كوكە ۇشتى. قازا تاپقانداردىڭ سانى بەلگىسىز. ال نيۋ- يورك تايمس باسپاسىنىڭ مالىمەتىنشە جويقىن جارىلىسىتان 300 سودىر كوز جۇمعان. ىلە- شالا ءۇندىستان تاراپى سوققى جاساۋىنىڭ سەبەبىن ءتۇسىندىردى.
ۆيدجاي گوحالە، ءۇندىستان سىرتقى ىستەر ءمينيسترىنىڭ ورىنباسارى:
- «دجايش- ە- مۋحامماد» لاڭكەستىك ۇيىمى ەلىمىزدىڭ ءتۇرلى وڭىرلەرىندە تەررورلىق اكت جاساۋعا دايىندالىپ جاتقاندىعى تۋرالى ناقتى اقپارات الدىق. سونداي- اق جانكەشتىلەردى جاتتىقتىرىپ جاتقانى دا ايتىلدى. سول سەبەپتى بىردەن ولاردىڭ ەڭ ۇلكەن جاتتىعۋ لاگەرىنە سوققى جاسادىق. وپەراتسيا بارىسىندا لاڭكەستەردىڭ اعا كومانديرلەرى، دجيحاديستەردىڭ كوزى جويىلدى.
ءۇندىستاننىڭ مۇنداي قادامعا بارۋىنا 14 - اقپان كۇنى بولعان قاندى تەراكت سەبەپ بولدى. پۋلۆاما وڭىرىندە اديل احمەد دار ەسىمدى 22 جاستاعى تەرروريست- جانكەشتى ورتالىق رەزەرۆتى پوليتسيا قىزمەتكەرلەرىن اكەلە جاتقان اۆتوبۋسقا كەلىپ سوقتىعىسىپ، تاقىمداعان كولىگىن جارىپ جىبەرگەن ەدى. سالدارىنان ءۇندىنىڭ 46 اسكەريى قازا تاپتى. لاڭكەستىك ارەكەتتى «دجايش- ە- مۋحامماد» ۇيىمى ءوز موينىنا الدى.
بۇل توپ دجاممۋ مەن كاشمير شتاتىن ءۇندىستاننان ءبولىپ پاكىستانعا قوسۋدى كوزدەپ جۇرگەن ۇيىم. سەبەبى اتالعان ەكى شتاتتا مەملەكەتتىك شەكارا جوق. تەك، باقىلاۋ پۋنكتتەرى ورناتىلعان. سول سەبەپتى بولسا كەرەك، نيۋ- دەلي لاڭكەستىك ۇيىمدى پاكىستان قولداپ وتىر دەيدى. ال، يسلاماباد بۇل ايىپتى مويىنداماي، كەرىسىنشە ۇندىلەردى قاتاڭ سىنعا الدى.
شاح ماحمۋد كۋرەشي، پاكىستان سىرتقى ىستەر ءمينيسترى:
- ءۇندىستان بۇگىن پاكىستانعا قارسى اگرەسسيا قولداندى. مۇنى باقىلاۋ جەلىسىن بۇزۋ دەپ ەسەپتەيمىن. سوندىقتان پاكىستان ەلى ءوز اۋماعىن قورعاۋ ءۇشىن مىندەتتى تۇردە جاۋاپ قاتاتىندىعىن ايتا كەتەيىن.
لاڭكەستىك ارەكەتتىڭ سوڭى ەكى ەلدىڭ اراقاتىناسىن ۋشىقتىرا ءتۇستى. ال بۇگىنگى اۋە سوققىسى 1971 -جىلى قوس ەل اراسىنداعى سوعىس اياقتالعالى جاسالعان العاشقى شابۋىل. سودان بولسا كەرەك، تەراكتكە قاتىسىمىز جوق دەگەن پاكىستاندىقتار ءۇندى ۇكىمەتىنە قارسى ەرەۋىل ۇيىمداستىردى. ولار ءۇندىستانعا سوعىس اشپاي، پاكىستان تەرريتورياسىنان ارى جۇرۋگە شاقىردى.
ماسۋد حان، پاكىستانعا قاراستى ازاد كاشمير وبلىسىنىڭ پرەزيدەنتى:
- ءۇندىستان سوعىس اشىپ، لاڭكەستەر ارقىلى كىنا ارتىپ، كاشمير مەن پاكىستانعا شابۋىل جاساماق. ءۇندىستاندى باسقارىپ وتىرعان پارتيا وسى ارقىلى مامىرداعى سايلاۋدا جەڭىسكە جەتپەك. بۇل بارىپ تۇرعان قاتىگەزدىك. سايلاۋ ءۇشىن سوعىس اشۋ نە دەگەن سۇمدىق.
نيۋ- دەلي يسلامابادتى لاڭكەستىك ۇيىمدى قولدادى دەپ ايىپتاسا، پاكىستان ءۇندىستان بۇل ارەكەتتى سايلاۋ ءۇشىن جاساپ وتىر دەيدى. وسى قادامدار ارقىلى ۇكىمەت حالىقتىڭ قولداۋىنا يە بولماق كورىنەدى. قالاي دەسەكتە، بۇل شابۋىلداردان سوڭ ەكى ەل اراسىنداعى ساۋدا تۇرالاپ قالدى. شەكارادا ءتۇرلى تاۋارلاردى تيەگەن جۇك كولىكتەرى تولىپ تۇر. سەبەبى ەكى تاراپ كاسىپكەرلەرى تاپسىرىستارىنان باس تارتقان. كوكونىس باعاسى دا قىمباتتاپ كەتكەن.
شاكير حان، كاسىپكەر:
- ءبىز شەكارادا تۇرىپ قالدىق. كولىكتەگى تاۋارلاردىڭ جارامدىلىعى ءوتىپ، ءيىسى شىعىپ جاتىر. كاسىپكەرلەر تاپسىرىستارىنان باس تارتۋدا. بار اقشامىزدى وسى تاۋارعا جۇمسادىق. ەندى نە ىستەرىمىزدى بىلمەيمىن.
www.24.kz