ديماشتىڭ استانادا وتەتىن ءان كەشىنە كىرۋ بيلەتىنىڭ ەڭ قىمبات ورىنى قانشا؟
قازاقستاندىق ءانشىنىڭ كەشىنە ارنالعان بيلەتتەردىڭ قۇنى 500 تەڭگەدەن باستالىپ، 50 مىڭ تەڭگەگە دەيىن بارادى دەپ حابارلايدى Sputnik قازاقستان اگەنتتىگى.
بۇل تۋرالى «قازاقستان» تەلەراديوكورپوراتسياسىنىڭ باسشىسى ەرلان قارين استانادا وتكەن باسپا ءسوز كونفەرەنتسياسىندا ءمالىم ەتتى.
ونىڭ ايتۋىنشا، بيلەتتەر الداعى اپتادا ساتىلىمعا شىعادى.
ديماشتىڭ تىڭدارماندارى 500 تەڭگە مەن 50 مىڭ تەڭگە ارالىعىنداعى بيلەتتەرگە قول جەتكىزە الادى.
«ءبىز بيلەتتەردىڭ باعاسىن قولجەتىمدى ەتۋگە تىرىستىق. كونسەرتتىڭ اۋقىمدىلىعىن ەسكەرسەك، 50 مىڭ تەڭگە دە ايتارلىقتاي قىمبات باعا ەمەس. ادەتتە مۇنداي كەشتەرگە ارنالعان بيلەتتىڭ قۇنى 300 دوللاردان اسىپ كەتەدى»، - دەدى ەرلان قارين.
ەرلان قاريننىڭ سوزىنشە، كونسەرتتىڭ بيلەتىنە ينتەرنەت جەلىسىندە دە قول جەتكىزە الادى.
ال جەلى قولدانۋشىلارى بيلەتتىڭ ساتىلىمعا شىققانىن اسىعا كۇتىپ وتىرعانىن جەتكىزدى.
«بيلەتتەردى جىبەرىپ الماۋ كەرەك»، «جەتپەي قالماسا بولار ەدى»، «ديماش، ءسىزدى استانادا كۇتەمىز»، «سەنىڭ داۋىسىڭدى ءوز قۇلاعىممەن ەستىگىم كەلەدى».
«مەن «باستاۋ» اتتى كونسەرتىڭىزدە بولعانمىن. وتە كەرەمەت ءوتتى»، «سول كەزدە 3 ساعات بويى توقتاۋسىز ءان ورىنداعان ەدىڭىز»، «جاپ-جاس بولساڭ دا وسىنداي جەتىستىككە جەتتىڭ. سەن باقىتتىسىڭ» دەپ جازدى ءانشىنىڭ فاناتتارى.