ساراپشى: «نۇر وتان» ءوز جۇمىسىندا عىلىمي نەگىزدەلگەن ۇسىنىمدارعا سۇيەنەدى
مۇنداي پىكىردى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى اقپاراتتىق-تالداۋ جۇمىسى ءبولىمىنىڭ باسشىسى، الەۋمەتتانۋ عىلىمدارىنىڭ كانديداتى اسارا مۇقانوۆا ءبىلدىردى، دەپ حابارلايدى قازاقپارات.
«نۇر وتان» پارتياسىنىڭ كۇن ءتارتىبى مەن قىزمەتى پارتيا كوشباسشىسى نۇرسۇلتان ءابىش ۇلى نازاربايەۆ قويعان مىندەتتەرگە بايلانىستى ۇنەمى وزگەرىپ وتىرادى. «نۇر وتان» پارتيانىڭ بارلىق مۇشەلەرىن جۇمىلدىرا وتىرىپ، مەملەكەت باسشىسىنىڭ كوپتەگەن ينستيتۋتسيونالدىق رەفورما جوبالارىن ازىرلەۋگە جانە جۇزەگە اسىرۋعا بەلسەنە قاتىسادى. بارلىق رەفورمالاردى تابىستى جۇزەگە اسىرۋ فاكتورلارىنىڭ ءبىرى - نورماتيۆتىك-قۇقىقتىق جانە زاڭنامالىق بازانى جەتىلدىرۋ بولىپ وتىر. بەس ينستيتۋتسيونالدىق رەفورمانىڭ ءارقايسىسى بويىنشا «نۇر وتان» ءبىرقاتار زاڭنامالىق اكتىلەردىڭ قابىلدانۋى تۋرالى باستاما كوتەردى»، - دەدى اسارا مۇقانوۆا.
وسىلايشا، پارتيا «بارشاعا ارنالعان زاماناۋي مەملەكەت» ءبىرىنشى رەفورمانى جۇزەگە اسىرۋ اياسىندا مەملەكەتتىك جانە وكىلەتتى ورگانداردىڭ قىزمەتىنە جاستاردىڭ قاتىسۋىن كەڭەيتۋدى، مەملەكەتتىك قىزمەتشىلەردىڭ تابىسى مەن مۇلكىن دەكلاراتسيالاۋ ماسەلەلەرىن رەتتەۋدى كوزدەيتىن زاڭنامالىق ۇسىنىستار ازىرلەدى.
«تۇراقتى ەكونوميكا» باعىتىندا «نۇر وتان» بيزنەستەگى مەملەكەتتىڭ قاتىسۋىن زاڭ جۇزىندە قىسقارتۋمەن قامتاماسىز ەتەتىن جاڭا ىسكەرلىك كودەكستى قابىلداۋ باستاماسىن كوتەردى. «اشىق جانە ەسەپ بەرەتىن مەملەكەت» رەفورماسىندا پارتيا «اقپاراتقا قول جەتكىزۋ تۋرالى»، «مەملەكەتتىك ساتىپ الۋلار تۋرالى»، «قوعامدىق باقىلاۋ تۋرالى» زاڭدارىنا زاڭنامالىق نورمالار پاكەتىن ازىرلەدى»، - دەپ تولىقتىردى ول.
ساراپشى جاعدايدى جۇيەلى جانە جان-جاقتى تالداۋسىز، مەملەكەتتىك باعدارلامالاردى مونيتورينگىلەۋ مەن باعالاۋسىز جانە قوعامدىق قولداۋسىز رەفورمالاردى تابىستى جۇزەگە اسىرۋدىڭ مۇمكىن ەمەستىگىن جەتكىزدى.
«سوندىقتان، «نۇر وتان» ءوز دامۋىنىڭ جاڭا كەزەڭىنە ەنىپ، ءوز جۇمىسىندا ساراپتاۋعا باسىمدىق بەرەدى. بۇگىندە شەشىمدەردى ازىرلەۋدە، پارتيا ساياساتىن وڭىرلەردە ىسكە اسىرۋدا جانە ستراتەگيالىق مىندەتتەردى ايقىنداعاندا پارتيا ءوزىنىڭ تالدامالىق قۇرىلىمدارىنىڭ بايسالدى تالداۋىنا جانە عىلىمي نەگىزدەلگەن ۇسىنىمدارىنا سۇيەنەدى. وڭىرلەر مەن تۇتاس ەلدەگى جاعدايدى جان-جاقتى جانە جۇيەلى تۇردە تالداۋ «نۇر وتانعا» جاڭا دامۋ تەندەنتسيالارىن قالىپتاستىرۋعا جانە وزەكتى پروبلەمالاردىڭ ۇتىمدى شەشىمدەرىن ۇسىنۋعا مۇمكىندىك بەرەدى»، - دەيدى اسارا مۇقانوۆا.