ەلوردا اكىمدىگىندە سيفرلاندىرۋ بويىنشا جاڭا باسقارما قۇرىلادى
بۇل تۋرالى قالا اكىمدىگىندە وتكەن جيىندا شاھار باسشىسى باقىت سۇلتانوۆ ءمالىم ەتتى، دەپ حابارلايدى قازاقپارات ءتىلشىسى.
«اكىمدىك قۇرامىندا جاڭادان سيفرلاندىرۋ جانە مەملەكەتتىك قىزمەت باسقارماسى قۇرىلادى. ەلباسىنىڭ ەلىمىزدى الەمنىڭ ەڭ وزىق 30 مەملەكەتىنىڭ قاتارىنا قوسۋ تۋرالى ناقتى تاپسىرماسى بار ەكەنىن جاقسى بىلەسىزدەر. بۇل، سايكەسىنشە جاڭا يننوۆاتسيالىق دامۋ مەن جەدەل تەحنولوگيالىق وزگەرىستەردى تالاپ ەتەدى»، - دەدى ول.
اكىمنىڭ ايتۋىنشا، بۇگىندە ەلوردادا «Smart Astana» جوباسى جۇيەلى تۇردە جۇزەگە اسىرىلۋدا. جانە ول الدىمەن حالىقتىڭ جاعدايىن جاقسارتۋدى، قولايلى قىزمەتتەردى ۇسىنۋدى كوزدەيتىن زاماناۋي جوبا.
«بۇگىندە سيفرلاندىرۋدىڭ ەڭ اۋەلى ەڭبەك ونىمدىلىگىن ارتتىرۋدا، قاراپايىم حالىققا جانە كاسىپكەرلەرگە ساپالى قىزمەت كورسەتۋدى قامتاماسىز ەتۋدە تيگىزەر ىقپالى زور. سونداي-اق، جىلدام ءارى قاۋىپسىز اقپارات ۇسىنۋعا، دەرەكتەردى جيناقتاۋ، وڭدەۋ، ادام كاپيتالىن دامىتۋ، ياعني كرەاتيۆتى قوعام قالىپتاستىرۋعا مۇمكىندىك بەرەدى»، - دەيدى ب. سۇلتانوۆ.
ونىڭ ايتۋىنا قاراعاندا، اكىمدىكتە باستالعان ترانسفورماتسيانىڭ ەكىنشى كەزەڭى باس قالانىڭ زامان تالاپتارىنا جاۋاپ بەرۋىنە جانە ودان ءارى دامۋىنا وڭ اسەرىن تيگىزۋى ءتيىس.
«وسىعان وراي، بارلىق ورىنباسارلارىما مەملەكەتتىك ورگانداردىڭ قىزمەتىن جان-جاقتى زەردەلەپ، ونى جاقسارتۋ جايلى ناقتى ۇسىنىستار ەنگىزۋدى تاپسىرامىن. بۇل اتالعان سالالارعا عانا ەمەس، وزگە دە باعىتتارعا دا قاتىستى. قىزمەتتەردىڭ قايتالانۋىن بولدىرماۋ ءۇشىن مەملەكەتتىك اپپاراتتىڭ قىزمەت ساپاسىن ارتتىرۋىمىز قاجەت»، - دەدى ەلوردا اكىمى.