استانادا ەكى نە ودان دا كوپ پاتەرى بار ادامداردىڭ سانى قانشا؟
ينتەرنەت-كونفەرەنسيا بارىسىندا ق ر قارجى مينيسترلىگىنىڭ مەملەكەتتىك كىرىستەر كوميتەتىنىڭ ءتوراعاسى مارات سۇلتانعازيەۆ مالىمدەدى. وقىرمان پاتەردى زاڭسىز جالعا بەرۋگە جانە سالىقتان جالتارۋعا قارسى كۇرەس شارالارى تۋرالى سۇرادى.
سۇلتانعازيەۆ «ازاماتتارعا ارنالعان ۇكىمەتتىڭ» مالىمەتتەرىنە سۇيەنە وتىرىپ، استانادا 29 مىڭ جەكە تۇلعانىڭ ەكى جانە ودان دا كوپ پاتەرى بارىن، ولاردىڭ ىشىندە 7,3 مىڭ ادامنىڭ جەكە كاسىپكەر رەتىندە تىركەلىپ، 18 مىڭ پاتەردىڭ جالعا بەرىلەتىنىن مالىمدەدى.
«مەملەكەتتىك كىرىستەر ورگاندارى تۇراقتى نەگىزدە ۋاكىلەتتى ورگانداردىڭ قولدا بار مالىمەتتەرىنە مونيتورينگ جۇرگىزۋ ارقىلى تىركەۋ ەسەبىنە قويۋ جانە سالىق سالۋعا تارتۋ بولىگىندە جىلجىمايتىن مۇلىكتى زاڭسىز جالعا بەرەتىن تۇلعالاردى انىقتاۋ بويىنشا شارالار جۇرگىزەدى، سونداي-اق، پوليتسيا ورگاندارىمەن بىرلەسكەن شارالار جۇرگىزىلەدى»، - دەپ حابارلادى سۇلتانعازيەۆ.
ونىڭ ايتۋىنشا، 2018 -جىلى استانا بويىنشا مەملەكەتتىك كىرىستەر دەپارتامەنتى جىلجىمايتىن مۇلىكتى جالعا بەرۋ سالاسىنداعى قىزمەتتى جۇزەگە اسىراتىن 3,4 مىڭ سالىق تولەۋشىنى تىركەۋ ەسەبىنە قوسىمشا قويعان. جالپى استانادا وسى قىزمەت ءتۇرى بويىنشا 14 مىڭنان اسا سالىق تولەۋشى تىركەلگەن.
Kaz.tengrinews.kz