شەتەلدەگى قانداستارعا قازاقستاندا ءبىلىم الۋ مۇمكىندىگى جايلى مالىمەت بەرىلەدى
تاراپتار ءبىلىم سالاسىنداعى ىنتىماقتاستىق تۋرالى مەموراندۋمعا قول قويدى، دەپ حابارلايدى قازاقپارات قوردىڭ باسپا ءسوز قىزمەتىنە سىلتەمە جاساپ.
«وتانداستار» قورى مەن حالىقارالىق باعدارلامالار ورتالىعى شەتەلدىك قانداستاردىڭ جوعارى ءبىلىم الۋىنا جاعداي جاسايدى.
«بولاشاق - ستۋدەنت جاستاردى قازاقستانعا جانە كەرىسىنشە قازاقستاننان شەتەلدىك جوعارى وقۋ ورىندارىنا تارتاتىن نەگىزگى ۇيىمداردىڭ ءبىرى. وسىنى نەگىزگە الا وتىرىپ، ءبىز كۇش بىرىكتىرگەلى تۇرمىز. مۇنداعى ماقسات - شەتەلدە تۇراتىن قانداستارىمىزدىڭ قالاۋىنشا قازاقستاندا نەمەسە شەتەلدىڭ ايگىلى جوعارى وقۋ ورىندارىندا ءبىلىم الۋ مۇمكىندىگىن قامتاماسىز ەتۋ»، - دەدى «وتانداستار» قورى پرەزيدەنتىنىڭ كەڭەسشىسى ديدار بولات.
جاقىن كۇندەرى «وتانداستار» قورى مەن حالىقارالىق باعدارلامالار ورتالىعى وكىلدەرى موڭعوليا، وزبەكستان جانە رەسەي فەدەراتسياسىنا بىرلەسىپ ساپارلايدى. ولار شەتەلدەگى قانداستارمەن، دالىرەك ايتقاندا مەكتەپ وقۋشىلارىمەن كەزدەسىپ، قازاقستاندا جانە شەتەلدىك جەتەكشى جوعارعى وقۋ ورىندارىندا ءبىلىم الۋ مۇمكىندىكتەرى جايلى اقپاراتتاندىراتىن بولادى.
«كەلەسى ايدا ءبىز موڭعولياعا، 120 مىڭعا جۋىق قازاق تۇراتىن بايان ولگەي ايماعىنا اتتانامىز. ونداعى قانداستىڭ شامامەن ءبىر جارىم مىڭى - بيىلعى مەكتەپ ءبىتىرۋشى تۇلەكتەر. ياعني قازاقستاندىق ءبىلىم وردالارىنا تۇسە الاتىن الەۋەتتى ستۋدەنتتەر. ماسەلەن، وتكەن جىلى وزبەكستاننان قازاقستاندا ءبىلىم الۋعا 12 مىڭ بالا كەلسە، ونىڭ 5 مىڭعا جۋىعى - ەتنيكالىق قازاقتار. ولارعا ىڭعايلى ءتيىمدى جاعدايدىڭ بارلىعى جاسالدى. اقتوبە ۋنيۆەرسيتەتى ءبىر جىل بويى تەگىن وقۋ مۇمكىندىگىن ۇسىندى. مۇنداي باعدارلامالار بىزدە كوپ، تەك قانداستارىمىزعا اقپارات كوپ جاعدايدا جەتپەي جاتادى»، - دەدى «وتانداستار» قورى پرەزيدەنتىنىڭ كەڭەسشىسى ديدار بولات.
ەسكە سالا كەتسەك، «وتانداستار» قورى 2017-جىلى دۇنيەجۇزى قازاقتارىنىڭ V قۇرىلتايىندا ەلباسىنىڭ تاپسىرماسى بويىنشا قۇرىلعان بولاتىن. قور قانداستاردى تاريحي وتان توڭىرەگىندە بىرلەستىرۋدى ماقسات تۇتادى.