قىزمەتكەرلەر باستىقتىڭ تاپسىرماسىمەن جۇمىستا كەشكە دەيىن وتىراتىنىن اشىق ايتا باستادى
سەبەبى بۇگىندە مەملەكەتتىك قىزمەتتە باستىقتىق تاپسىرماسىمەن ارتىق جۇمىس جاساۋ فاكتىلەرى ءالى دە بار. قىزمەتكەرلەر ونى اشىق ايتىپ، بايلانىس- ورتالىعىنا ارىزدانىپ وتىرادى، دەپ حابارلايدى قازاقپارات ءتىلشىسى.
مەملەكەتتىك قىزمەت سالاسىنداعى باقىلاۋ دەپارتامەنتى ديرەكتورىنىڭ مىندەتىن اتقارۋشى مادينا ناۋرىزبەكتىڭ ايتۋىنشا، بۇگىندە مەملەكەتتىك ورگانداردا جۇمىس كەستەسىن بۇزىپ، كەشكە دەيىن جۇمىس ىستەۋ فاكتىلەرى بىرتىندەپ ازايىپ كەلەدى. الايدا ونداي وقيعالار ءالى دە بار. «مىسالى، ق ر قارجى مينيسترلىگىندە ۇستەمە جۇمىستاردىڭ ايتارلىقتاي ازايۋىنا قاراماستان، 1424 Call-ورتالىعىنا مينيسترلىكتىڭ الەۋمەتتىك سالا بيۋدجەتى دەپارتامەنتىنىڭ مەملەكەتتىك قىزمەتشىلەرى حابارلاسىپ، جۇمىس كەستەسىنىڭ بۇزىلۋىنا شاعىمداندى. ولاردىڭ سوزدەرىنە سايكەس، مەملەكەتتىك قىزمەتشىلەر جۇمىس ورىندارىندا ساعات 18.30-دان كەيىن باسشىلىقتىڭ تالابى بويىنشا قالىپ وتىرادى. سوسىن كەشكى جۇمىس ماجىلىستەرى كوپ دەيدى. وسىعان بايلانىستى، اگەنتتىك ۇكىمەتتىك ەمەس ۇيىمداردىڭ وكىلدەرىمەن بىرلەسە وتىرىپ، پروفيلاكتيكالىق ءىس- شارالار وتكىزدى. سونىڭ قورىتىندىسى بويىنشا اتالعان فاكتىلەر راستالدى»، - دەدى م. ناۋرىزبەك استانادا وتكەن باسپا ءسوز ءماسليحاتىندا.
اتالعان ماسەلەنى ق ر ەڭبەك جانە حالىقتىق الەۋمەتتىك قورعاۋ مينيسترلىگى دە ءجىتى باقىلاۋدا ۇستاپ وتىر. ەڭبەك، الەۋمەتتىك قورعاۋ جانە كوشى-قون كوميتەتى ءتوراعاسىنىڭ ورىنباسارى تولەگەن وسپانقۇلوۆتىڭ سوزىنە قاراعاندا، وتكەن جىلدىڭ سوڭىندا ەڭبەك زاڭناماسىن ساقتاۋ بويىنشا بارلىق ايماقتار تەكسەرىلدى. سونىڭ ناتيجەسىندە ورتالىق ورگانداردىڭ 6 باسشىسى اكىمشىلىك جاۋاپكەرشىلىككە تارتىلدى. ولاردىڭ اراسىندا ق ر ءدىن ىستەرى جانە قوعامدىق دامۋ مينيسترلىگى، ق ر دەنساۋلىق مينيسترلىگى، ق ر ادىلەت مينيسترلىگى، ق ر ءبىلىم جانە عىلىم مينيسترلىگى، ق ر اۋىل شارۋاشىلىعى مينيسترلىگى مەن ق ر ۇلتتىق ەكونوميكا مينيسترلىگىنىنىڭ لاۋازىمدى تۇلعالارى بار. سولاردىڭ قاراماعىندا ىستەيتىن قىزمەتكەرلەر جۇمىستا ءوز ەركىمەن ەمەس، باستىقتاردىڭ تاپسىرماسى بويىنشا قالعانىن اشىق ايتتى. ء«يا، باسشىلىقتىڭ تاپسىرماسىمەن جۇمىستا كەش قالدىق دەپ، اشىق ايتقان قىزمەتكەرلەر دە بولدى. ءبىراق باسىم بولىگى ءوز ەركىمەن قالىپ وتىرعانىن جەتكىزدى. نەگىزى، قىزمەتكەر باسشىلىقتىڭ تاپسىرماسىمەن جۇمىستا قالىپ وتىرسا، ماڭىزدى ءبىر ماسەلەنى ۇمىتپاۋ قاجەت. ءاربىر جۇمىسشىنىڭ، سونىڭ ىشىندە مەملەكەتتىك قىزمەتكەردىڭ وزىنە جۇكتەلگەن مىندەتتەرىنەن بولەك قۇقىقتارى دا بار. سوندىقتان ونى دەمالىستا، يا بولماسا مەرەكە كۇندەرى جۇمىسقا تارتسا، مىندەتتى تۇردە جازباشا كەلىسىمى بولۋى قاجەت. ونداي كەلىسىم بولماسا، قىزمەتكەردى جۇمىسقا سالۋعا بولمايدى. ول ادامعا قىسىم جاساۋعا دا رۇقسات جوق»، - دەپ اتاپ كورسەتتى ت. وسپانقۇلوۆ.
ايتا كەتەيىك، بۇگىن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ارتىق جۇمىس جاساۋ فاكتىلەرىنە قاتىستى كەزەكتى تەكسەرىستىڭ ناتيجەسىن جاريالادى. «بيىل قاڭتار ايىندا مەملەكەتتىك ورگانداردا ۇستەمە جۇمىس فاكتىلەرى بويىنشا «سكۋد» جۇيەسىنىڭ دەرەكتەرىنە كەزەكتى تالداۋ جۇرگىزىلدى. وتكەن جىلدىڭ قىركۇيەك جانە جەلتوقسان ايلارىمەن سالىستىرعاندا وڭ سەرپىن بايقالادى. 2018 -جىلدىڭ قىركۇيەگىندە 12739 ساعات بولسا، جەلتوقساندا مەمورگانداردا ارتىق جۇمىس 4790 ساعاتقا دەيىن ازايدى. ال قاڭتار ايىندا اتالعان كورسەتكىش 1194 ساعاتقا دەيىن قىسقاردى»، - دەدى م. ناۋرىزبەك.
ونىڭ ايتۋىنشا، ءبىرقاتار مەملەكەتتىك ورگانداردا ارتىق جۇمىس جاساۋ فاكتىلەرى مۇلدەم جويىلدى دەۋگە بولادى. سونىڭ ىشىندە ق ر يندۋستريا جانە ينفراقۇرىلىمدىق دامۋ مينيسترلىگى، ق ر ادىلەت مينيسترلىگى، ق ر ءبىلىم جانە عىلىم مينيسترلىگى، ق ر قورعانىس جانە اەروعارىش ونەركاسىبى مينيسترلىگى، ق ر مادەنيەت جانە سپورت مينيسترلىگى بار.
«قالعان مەملەكەتتىك ورگانداردا ۇستەمە جۇمىس فاكتىلەرىنىڭ ايتارلىقتاي ازايعانى بايقالادى. ايماقتاردا دا سولاي. سونىمەن قاتار، جەكەلەگەن مينيسترلىكتەردە ءالى دە ۇستەمە جۇمىس فاكتىلەرى بار. مىسالى، ق ر سىرتقى ىستەر مينيسترلىگىندە قاڭتار ايىندا 369 ساعات ۇستەمە جۇمىس انىقتالدى. ق ر دەنساۋلىق ساقتاۋ مينيسترلىگىندە 151 ساعات انىقتالدى. وسىعان بايلانىستى بارلىق مەملەكەتتىك ورگاندارعا ءتيىستى شارالاردى قابىلداۋعا قاتىستى ۇسىنىستار بەرىلدى»، - دەپ اتاپ كورسەتتى م. ناۋرىزبەك.