تولەبي اۋدانى اكىمىنىڭ ورىنباسارىن اتىپ كەتكەندەر سوت زالىندا بوساتىلدى

تۇركىستان. قازاقپارات - تۇركىستان وبلىسى، تولەبي اۋدانى اكىمىنىڭ ورىنباسارى رابيعا بەيسەبايەۆاعا وق اقتاندار سوت زالىندا بوساتىلدى.

اۋداندىق سوت ءتورت ايىپتالۋشىعا قاتىستى بۇگىن باس بوستاندىقتارىن شەكتەۋ ۇكىمىن شىعاردى، دەپ حابارلايدى قازاقپارات ءتىلشىسى.

سوت ۇكىمى بويىنشا قىلمىستى ۇيىمداستىرۋشى ءارى تاپسىرىس بەرۋشى دەپ تانىلعان امالبايەۆقا قىلمىستىق كودەكستىڭ 28 -بابىنىڭ 3 -بولىگى «قىلمىستىق قۇقىق بۇزۋشىلىققا سىبايلاس قاتىسۋشىلاردىڭ تۇرلەرى» جانە 389 -بابىنىڭ 3 -بولىگى «وزىنشە بيلىك ەتۋ، كۇش قولدانۋمەن نەمەسە ونى قولدانۋ قاتەرىن توندىرۋمەن نە ادامدار توبىنىڭ الدىن الا ءسوز بايلاسۋىمەن جاسالعان ءىس- ارەكەت» بويىنشا كىنالى دەپ تانىلىپ، ءبىر جىلعا باس بوستاندىعىنان شەكتەۋ جازاسى تاعايىندالدى.

بەكتانوۆ قىلمىستىق كودەكستىڭ 28 -بابىنىڭ 5 -بولىگى («قىلمىستىق قۇقىق بۇزۋشىلىققا سىبايلاس قاتىسۋشىلاردىڭ تۇرلەرى»)، 389 -باپتىڭ 3 -بولىگى «وزىنشە بيلىك ەتۋ»، 287 -باپتىڭ 2 -بولىگى «قارۋدى، وق- دارىلەردى، جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ» بويىنشا ايىپتى دەپ تانىلدى. تۇپكىلىكتى 1 جىل 6 ايعا باس بوستاندىعىن شەكتەۋ جازاسىن وتەيتىن بولدى. ال قالعان تازابەكوۆ پەن تولەپبەكوۆتەر قىلمىستىق كودەكستىڭ 389-بابى 3 -بولىگى جانە 287 بابىنىڭ 2 -بولىگىمەن كىنالى دەپ تانىلدى.

ولارعا دا 1 جارىم جىل 6 اي باس بوستاندىعىن شەكتەۋ جازاسى تاعايىندالدى. ءىستى قاراعان سۋديا ۇكىم شىعارۋ كەزىندە جابىرلەنۋشى تاراپتىڭ كەشىرىم بەرۋى مەن سوت كەزىندە انىقتالعان ءمان-جايلار ەسكەرىلگەنىن اتاپ ءوتتى.

ەسكە سالا كەتسەك، وتكەن جىلدىڭ قازان ايىندا تولەبي اۋدانى اكىمىنىڭ ورىنباسارى رابيعا بەيسەبايەۆاعا بەلگىسىز بىرەۋلەر شابۋىل جاساپ، ولتىرۋگە ارەكەتتەنگەن بولاتىن.

تۇسكى ءۇزىلىس كەزىندە قىزمەتتىك كولىگىمەن ۇيىنە كەلگەن ساتتە ءۇش تۇلعا وعان قاراي بىرنەشە رەت وق اتقان ەدى. شەنەۋنىك ەڭكەيىپ قالىپ، كولىگىنىڭ ەسىگىن قۇلىپتاپ ۇلگەرەدى. وسى كەزدە شۋدى ەستىگەن كورشىلەر جينالىپ، سەزىكتىلەر قاشىپ كەتكەن. كەيىننەن سوتقا قاتىسقان پروكۋرور الماس ساعىندىقوۆ شەنەۋنىكتىڭ تانىسى سەرىك بەكتانوۆ باس ارازدىعىنا بايلانىستى رابيعا بەيسەبايەۆادان كەك الماق بولعانىن ايتىپ ءوتتى.

ءسويتىپ جامبىل وبلىسىنىڭ تۇرعىنى ادىلەت تورەبەكوۆكە حابارلاسىپ، تاپسىرىس بەرگەنىن جەتكىزدى. ول ءۇشىن 1 ميلليون 300 مىڭ تەڭگە بەرۋگە ۋاعدالاسقان. وسىدان كەيىن تورەبەكوۆ، تازابەكوۆ جانە امالبايەۆتار بۇل تاپسىرىستى ورىنداۋعا وقتالعان. الايدا العاش رەت ارام ويلارىن جۇزەگە اسىرا المايدى. ەكىنشى رەت تاعى بارىپ، ۇشەۋى اۋدان اكىمى ورىنباسارىنىڭ ءۇيىنىڭ ماڭىنا كەلىپ، ونى ولتىرمەك بولادى.