مەملەكەت باسشىسىنىڭ جارلىعىمەن ءتورت سۋديا جۇمىستان بوساتىلدى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ۇسىنىسىمەن بىرنەشە سۋديا قىزمەتتەن بوساتىلدى، دەپ حابارلايدى قازاقپارات ءتىلشىسى.

سىبايلاس جەمقورلىققا قارسى ءىس-قيمىل ۇلتتىق بيۋروسى ءتوراعاسىنىڭ ورىنباسارى شىڭعىس قابدولانىڭ ايتۋىنشا، بۇگىندە ەتيكالىق نورمالار اياسىندا جەمقورلىقتىڭ الدىن الۋ شارالارى جۇرگىزىلىپ كەلەدى. وسىلايشا، ۇلتتىق بيۋرو ق ر جوعارى سوتىنا شىعىس قازاقستان وبلىسىنىڭ ءتورت سۋدياسىنا قاتىستى ۇسىنىس حات ەنگىزگەن بولاتىن.

«بىزگە جاۋاپ كەلدى. اعىمداعى جىلى 20 -اقپاندا مەملەكەت باسشىسىنىڭ جارلىعىمەن قول قويىلدى. تارتىپتىك كوميسسيانىڭ شەشىمىمەن سوت ەتيكاسىنا قايشى ارەكەت جاساعانى ءۇشىن وسكەمەن قالالىق №2 -سوتىنىڭ ءتوراعاسى ك. ت. قاسىموۆ، وسى سوتتىڭ سۋديالارى - م. ك. ارعىمبەردى جانە گ. ك. قايرولدينا، سونداي-اق، گلۋبوكوۆودسكي اۋداندىق سوتىنىڭ سۋدياسى ب. گ. ءامىروۆ قىزمەتتەن بوساتىلدى. بۇگىننەن باستاپ اتالعان قۇجات كۇشىنە ەندى»، - دەدى ش. قابدولا استانادا وتكەن باسپا ءسوز ءماسليحاتىندا.

ونىڭ سوزىنە قاراعاندا، بۇگىندە ونداي ماتەريالدار كوپ. نەگىزگى ماقسات - تارتىپتىك قۇقىق بۇزۋشىلىقتار اياسىندا قاۋىپ-قاتەرلەردى انىقتاپ، قىلمىستىڭ الدىن الۋ. ول ءۇشىن ادامدى دەر كەزىندە قىزمەتتەن شەتتەتۋ كەرەك.

ق ر جوعارى سوتىنىڭ ىشكى قاۋىپسىزدىك جانە جەمقورلىقتىڭ الدىن الۋ ءبولىمىنىڭ مەڭگەرۋشىسى قايرات بيجانوۆتىڭ سوزىنە قاراعاندا، جۇمىستان شىعارىلعان ءتورت سۋديانىڭ ءبارى تارتىپتىك قۇقىق بۇزۋشىلىقتارعا جول بەرگەن. ماسەلەن، قاسىموۆ پەن ارعىمبەردى ەتيكالىق نورمالاردى بۇزدى. ال قايرولدينا مەن ءامىروۆ قىلمىستىق ىستەر بويىنشا جاۋاپقا تارتىلعان ادامدارمەن بايلانىس جاساپ، جەمقورلىققا ارەكەتتەرىن جاسادى.

«ولار مەملەكەت باسشىسىنىڭ جارلىعىمەن جۇمىستان بوساتىلدى. بۇدان بىلاي تورتەۋى دە سوتتا دا، جالپى مەملەكەتتىك قىزمەتتە جۇمىسقا تۇرا المايدى»، - دەپ اتاپ كورسەتتى ق. بيجانوۆ.