ۇلتتىق ۆاليۋتاداعى ءماتىن تەك قازاق تىلىندە بولادى

استانا. قازاقپارات - قازاقستان تەڭگەسى بانكنوتتارى ەندى تەك قازاق تىلىندە جازىلادى.

بۇل تۋرالى «ۇلتتىق ۆاليۋتا - قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىن بەكىتۋ تۋرالى» ق ر پرەزيدەنتىنىڭ 2018 -جىلعى 12 -جەلتوقسانداعى № 804 -جارلىعىندا اتاپ كورسەتىلگەن، دەپ حابارلايدى قازاقپارات ءتىلشىسى.

«بانكنوتتار مەن مونەتالار ديزاينىندا پايدالانىلاتىن جازبالار ءماتىنى مەملەكەتتىك تىلدە رەسىمدەلەدى. ينۆەستيتسيالىق جانە كوللەكتسيالىق مونەتالار ديزاينىندا شەت تىلدەردە جازبالار پايدالانۋعا جول بەرىلەدى»، - دەلىنگەن قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىنىڭ 2- تاراۋىندا.

سونىمەن قاتار وندا ينۆەستيتسيالىق جانە كوللەكسيالىق مونەتالار ديزاينىندا مونەتالار دايىندالعان مەتالدى، ونىڭ سىنامىن جانە ماسساسىن بىلدىرەتىن جازبالاردى پايدالانۋعا جول بەرىلەتىنى اتاپ وتىلگەن.

ايتا كەتەيىك، بۇعان دەيىن بانكنوتتار مەن مونەتالاردا مەملەكەتتىك جانە ورىس تىلدەرىندەگى جازۋلار پايدالانىلاتىنى زاڭدى كۇشىندە بولعان ەدى.

«شەت تىلىندە رەسىمدەلەتىن باسقا ەلدەردىڭ تاپسىرىستارى بويىنشا دايىندالاتىن كوللەكتسيالىق مونەتالاردى قوسپاعاندا، كوللەكتسيالىق جانە ينۆەستيتسيالىق مونەتالاردا جازۋلاردىڭ ءماتىنى مەملەكەتتىك، سونداي-اق ورىس نەمەسە شەت تىلدەرىندە رەسىمدەلەدى»، - دەپ جازىلعان ەدى قۇجاتتا.