قازاقستاندا جاڭا ۇكىمەت قالاي قۇرىلادى؟

 استانا. قازاقپارات - مەملەكەتتىڭ اتا زاڭىندا ۇكىمەتتى جاساقتاۋ پروتسەدۋراسى تۋرالى نە ايتىلعان؟

قازاقستان رەسپۋبليكاسىنىڭ كونستيتۋتسياسىنا سايكەس ۇكىمەت وتستاۆكاعا كەتكەننەن كەيىن مەملەكەت باسشىسى پارلامەنت ماجىلىسىنە جاڭا پرەمەر-ءمينيستردىڭ كانديداتۋراسىن ۇسىنۋى ءتيىس، دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىنە سۇيەنىپ.

اتا زاڭنىڭ 44-بابى 3-تارماعىندا قازاقستان پرەزيدەنتى پارلامەنت ماجىلىسىندە وكىلدىگى بار ساياسي پارتيالار فراكتسيالارىمەن كونسۋلتاتسيالاردان كەيىن كەلىسىم بەرۋ ءۇشىن ءماجىلىستىڭ قاراۋىنا پرەمەر- ءمينيستردىڭ كانديداتۋراسىن ەنگىزەتىنى ايتىلعان.

ءماجىلىستىڭ كەلىسىمىنەن كەيىن مەملەكەت باسشىسى پرەمەر- ءمينيستردى قىزمەتكە تاعايىندايدى. سودان كەيىن پرەمەر- ءمينيستردىڭ ۇسىنۋىمەن پرەزيدەنت ۇكىمەتتىڭ قۇرىلىمىن ايقىنداپ، تومەنگى پالاتامەن كونسۋلتاتسيالاردان كەيىن ۇكىمەت مۇشەلەرىن قىزمەتكە تاعايىندايدى.

سونىمەن قاتار، پرەزيدەنت سىرتقى ىستەر، قورعانىس، ىشكى ىستەر مينيسترلەرىن قىزمەتكە دەربەس تاعايىندايدى؛

ۇكىمەت جاساقتالعاننان كەيىن، مەملەكەت باسشىسى مينيسترلەر كابينەتىنىڭ انتىن قابىلدايدى.

بۇعان قوسا، پرەزيدەنت ەرەكشە ماڭىزدى ماسەلەلەر بويىنشا قاجەتتىگىنە قاراي ۇكىمەت وتىرىستارىنا ءتوراعالىق ەتەدى.

سونداي-اق، كونستيتۋتسياعا سايكەس، مەملەكەت باسشىسى پرەمەر مەن ۇكىمەتتىڭ باسقا دا مۇشەلەرىن قىزمەتىنەن بوساتادى، نەمەسە وبلىستار، رەسپۋبليكالىق ماڭىزى بار قالالار مەن استانا اكىمدەرى اكتىلەرىنىڭ كۇشىن جويادى، نە قولدانىلۋىن تولىق نەمەسە ءىشىنارا توقتاتا تۇرادى.

نەگە ءماجىلىس؟

اتا زاڭنىڭ 56-بابىندا ءماجىلىستىڭ قاراۋىنا پالاتا دەپۋتاتتارىنىڭ جالپى سانىنىڭ كوپشىلىك داۋسىمەن پرەزيدەنتكە پرەمەر- ءمينيستردى تاعايىنداۋعا كەلىسىم بەرۋ جاتاتىنى كورسەتىلگەن.

ۇكىمەت قالاي قۇرىلادى

كونستيتۋتسيانىڭ 65-بابىنا سايكەس قازاقستان رەسپۋبليكاسىنىڭ پرەزيدەنتى ۇكىمەتتى اتا زاڭدا كوزدەلگەن تارتىپپەن قۇرادى.

مينيسترلەر كابينەتىنىڭ باسشىسى تاعايىندالعاننان كەيىنگى ون كۇن مەرزىم ىشىندە پرەمەر- مينيستر ۇكىمەتتىڭ قۇرىلىمى مەن قۇرامى تۋرالى پرەزيدەنتكە ۇسىنىس ەنگىزەدى.

ۇكىمەت مۇشەلەرى قازاقستان حالقى مەن پرەزيدەنتىنە انت بەرەدى.

ۇكىمەت نەگە وتستاۆكاعا كەتتى؟

قازاقستان پرەزيدەنتى نۇرسۇلتان نازاربايەۆ بەيسەنبى، 21 -اقپان كۇنى رەسپۋبليكانىڭ ونىنشى پرەمەر- ءمينيسترى باقىتجان ساعىنتايەۆ باسقارعان ۇكىمەتتى وتستاۆكاعا جىبەردى.

مەملەكەت باسشىسى وسى ماسەلەگە قاتىستى جاساعان مالىمدەمەسىندە ۇكىمەت پەن ۇلتتىق بانك ەل ەكونوميكاسىن ساپالى دامىتۋعا سەرپىن بەرەتىن ناقتى قۇرالداردى تولىققاندى جاساپ شىعارا الماعانىن اتاپ ءوتتى. پرەزيدەنتتىڭ ايتۋىنشا، جۇيەلى جۇمىس جۇرگىزىلمەگەن، تۇرعىنداردىڭ ناقتى تابىسى وسپەدى، وتباسىلاردىڭ بيۋدجەتىندە ازىق- تۇلىككە دەگەن شىعىن كولەمى ارتا ءتۇستى. اتقارۋشى ورگانداردىڭ سالعىرتتىعىنان الەۋمەتتىك تۇرعىدان از قامتىلعان تۇرعىنداردىڭ ءبىر بولىگى اتاۋلى الەۋمەتتىك كومەكپەن قامتىلماعان.

ونىڭ ۇستىنە، نازاربايەۆتىڭ پىكىرىنشە، ۇكىمەت مۇشەلەرى، مينيسترلەر، اكىمدەر حالىقپەن جۇمىس ىستەي المادى، سونداي- اق جۇرتشىلىقتىڭ پروبلەمالارىنا قۇلاق اسىپ، اتقارىلىپ جاتقان ىستەر مەن ساياساتتى ءتۇسىندىرۋ جۇمىستارىن جۇرگىزۋگە شاماسى كەلمەدى.

پرەمەر- ءمينيستردىڭ مىندەتىن ۋاقىتشا اتقارۋ اسقار مامينگە جۇكتەلدى.

مەملەكەت باسشىسى 27 -اقپاندا وتەتىن «نۇر وتان» پارتياسىنىڭ سەزىندە جاڭا ۇكىمەتتىڭ مىندەتتەرى تۋرالى تولىعىراق ايتۋعا ۋادە بەردى.