اتىراۋدا «ءتاتتى» كىتاپتار كورمەسى ءوتتى
نازاربايەۆ زياتكەرلىك مەكتەبىندە وتكەن «ءتاتتى» كىتاپتار كورمەسى قالىڭ وقىرماننىڭ كىتاپقا دەگەن قىزىعۋشىلىعىن وياتۋعا ارنالعان «Kitap-Fest»جوباسى اياسىندا ۇيىمداستىرىلدى. جوبا شەڭبەرىندە اتالمىش وقۋ ورنىنىڭ «شاڭىراق» وقۋشىلار قاۋىمداستىعىنىڭ مۇشەلەرىنە، اتا- انالار مەن ۇستازدارعا 16 ادەبيەتتى ءبىر ايدا وقىپ شىعۋ ۇسىنىلعان بولاتىن.
«ولار اۋەلى بەرىلگەن كىتاپتى وتباسىندا جانە مەكتەپتە ءۇزىلىس كەزىندە وقىدى. ءاربىر كىتاپتىڭ مازمۇندىلىعى مەن قالىڭ بولۋىنا بايلانىستى فەستيۆالدى ءبىر ايعا سوزۋعا تۋرا كەلدى» ، - دەيدى ۇيىمداستىرۋشىلار.
وزىق وقىرماندار مادەنيەتىن دامىتۋعا ارنالعان «كىتاپ- فەست» فەستيۆالى بىرنەشە كەزەڭدى قامتىدى. اۋەلى، نازاربايەۆ زياتكەرلىك مەكتەبىنىڭ وقۋشىلارى تاربيە مەن وقىتۋ، بالا مەن اتا- انا اراسىنداعى قارىم- قاتىناستى ارتتىرۋعا ارنالعان ۇزدىك ادەبيەتتەردى وزدەرى وقىعان سوڭ، ولاردى قالا تۇرعىندارىنا ناسيحاتتادى. «كىتاپ قالانى ارالايدى» اكسياسى اياسىندا «شاڭىراق» قاۋىمداستىعىنىڭ مۇشەلەرى قالا كوشەلەرىندە، قوعامدىق كولىكتەردە، ءتۇرلى جەكەمەنشىك جانە مەملەكەتتىك ۇيىمدارعا بارىپ، كىتاپ تۋرالى ايتىپ بەردى. تاڭداۋلى شىعارمالاردىڭ باسىم كوپشىلىگى بالامەن بايلانىس ورناتۋ، جاسوسپىرىمدەر پسيحولوگياسىنداعى كۇيزەلىستەردىڭ الدىن الۋ، اتا- انانىڭ قوعامداعى ءرولى ماسەلەلەرىنە ارنالعان. ولاردىڭ اراسىندا سانجار كەرىمبايدىڭ «ومىرگە عاشىق بولۋ» ، ولگا گروموۆانىڭ «شەكەر بالا» ، ستيۆەن كوۆيدىڭ «وتباسى تۇراقتىلىعىنىڭ جەتى قاعيداسى» تۋىندىلارى بار.
اقپان ايىنىڭ باسىندا باستاۋ العان جوبا ءوز مارەسىنە جەتتى. وسىعان وراي مەكتەپ وقۋشىلارى كىتاپتار فورماسىندا تورتتار ءپىسىرىپ، كورمە ۇيىمداستىردى. تورتتاردىڭ ءبىرى كىتاپ مۇقاباسى رەتىندە بەزەندىرىلسە، ءبىرىنىڭ بەتىنە ناقىل سوزدەر جازىلعان. كورمەگە سونداي - اق وقۋشىلاردىڭ قولىمەن جاسالعان ءتۇرلى بۇيىمدار، تۇرمىستىق زاتتار قويىلدى.
«ارينە، باستى ماقسات وسىنداي كورمە جاساپ، تاڭعالدىرۋ ەمەس. كەرىسىنشە، وقۋشىلار مەن اتا- انالاردىڭ كىتاپ وقۋعا دەگەن قىزىعۋشىلىعىن ارتتىرۋدىڭ تىڭ فورماتى دەسەك دۇرىس بولادى. سەبەبى، بۇل كىتاپتاردى بالالار مەن اتا- انالار وزدەرى وقىپ شىقتى. سايكەسىنشە، جاسالعان كادەسىيلار، جارمەڭكەدە ۇسىنىلىپ وتىرعان تاۋارلاردىڭ بارلىعى بەلگىلى ءبىر كىتاپتىڭ مازمۇنىن سيپاتتايدى» ، - دەدى مەكتەپتىڭ باسپا ءسوز حاتشىسى ءانۋار جامانقۇلوۆ.