ۇكىمەت وتستاۆكاسى: جاڭا مينيسترلەر كابينەتى قالاي جاساقتالادى

استانا. قازاقپارات - كەشە كەشكىسىن ەلباسى نۇرسۇلتان نازاربايەۆ توسسىننان مالىمدەمە جاساپ، ەل ەكونوميكاسىن ساپالى دامىتۋعا سەرپىن بەرەتىن ناقتى قۇرالداردى تولىققاندى جاساپ شىعارا الماعان، مەملەكەتتىك باعدارلامالاردى جۇزەگە اسىرۋ بارىسىندا ناقتى ناتيجەلەرگە قول جەتكىزبەگەن باقىتجان ساعىنتايەۆ باسشىلىق جاسايتىن ۇكىمەت وتستاۆكاعا كەتۋى تيىستىگىن ايتقان بولاتىن.

 «ۇكىمەت مۇشەلەرى، مينيسترلەر، اكىمدەر حالىقپەن جۇمىس ىستەي المادى، سونداي- اق جۇرتشىلىقتىڭ پروبلەمالارىنا قۇلاق اسىپ، اتقارىلىپ جاتقان ىستەر مەن ساياساتتى ءتۇسىندىرۋ جۇمىستارىن جۇرگىزۋگە شاماسى كەلمەدى. بۇل رەتتە، مەن ەل پرەزيدەنتى ءارى كونستيتۋتسيانىڭ كەپىلى رەتىندە حالىقتىڭ مۇددەسىن ەسكەرە وتىرىپ، مىناداي شەشىم قابىلدادىم. ۇكىمەت وتستاۆكاعا كەتۋگە ءتيىس دەپ سانايمىن»، - دەگەن ەدى نۇرسۇلتان نازاربايەۆ.

باقىتجان ساعىنتايەۆ تا ۇزاق كۇتتىرگەن جوق، ەل ۇكىمەتىنىڭ وتستاۆكاعا كەتۋىنە بايلانىستى ارنايى مالىمدەمە جاسادى.

 «بۇگىن ۇكىمەت وتستاۆكاعا كەتتى. تاۋەلسىز قازاقستان مەملەكەتىنىڭ نەگىزىن قالاپ، بۇگىنگى بيىكتەرگە جەتكىزگەن ەلباسى حالقىنىڭ ءوسىپ- وركەندەۋىن ءارقاشان ەڭ باستى قاعيدا رەتىندە ۇستانىپ، ءاربىر شەشىمىن مەملەكەت پەن حالىقتىڭ مۇددەسى تۇرعىسىنان قابىلداپ كەلەدى. مەملەكەت قۇرۋ وڭاي جۇمىس ەمەس. جاس مەملەكەتتى ءتۇرلى قايشىلىقتار مەن قاقتىعىستاردان امان الىپ ءوتىپ، تاريحي ولشەممەن العاندا تىم قىسقا مەرزىمدە وسىنداي ابىرويلى ەل ەتۋ شىن مانىندە شەكسىز قۇرمەتكە لايىق»، - دەپ اتاپ ءوتتى ول.

وسىدان كەيىن ەلباسى نۇرسۇلتان نازاربايەۆ ق ر ۇكىمەتىنىڭ ورنىنان ءتۇسۋى تۋرالى جارلىققا قول قويىپ، پرەمەر- ءمينيستردىڭ مىندەتىن ۋاقىتشا اتقارۋدى اسقار مامينگە جۇكتەگەن ەدى.

 ەندى ق ر كونستيتۋتسياسىنىڭ 44-بابىنىڭ 3 - تارماعىنا سايكەس، قازاقستان رەسپۋبليكاسىنىڭ پرەزيدەنتى پارلامەنت ماجىلىسىندە وكىلدىگى بار ساياسي پارتيالار فراكسيالارىمەن كونسۋلتاتسيالاردان كەيىن كەلىسىم بەرۋ ءۇشىن ءماجىلىستىڭ قاراۋىنا رەسپۋبليكا پرەمەر- ءمينيسترىنىڭ كانديداتۋراسىن ەنگىزەدى. پارلامەنت ءماجىلىسىنىڭ كەلىسىمى الىنعاننان كەيىن رەسپۋبليكانىڭ پرەمەر- ءمينيسترىن قىزمەتكە تاعايىندايدى.

سونان سوڭ ەلباسى پرەمەر- ءمينيستردىڭ ۇسىنۋىمەن ۇكىمەتتىڭ قۇرىلىمىن ايقىنداپ، پارلامەنت ماجىلىسىمەن كونسۋلتاتسيالاردان كەيىن پرەمەر- ءمينيستردىڭ ۇسىنۋىمەن ۇكىمەت مۇشەلەرىن قىزمەتكە تاعايىندايدى. بۇل رەتتە مەملەكەت باسشىسى سىرتقى ىستەر، قورعانىس، ىشكى ىستەر مينيسترلەرىن قىزمەتكە دەربەس تاعايىندايتىندىعىن ەسكەرگەن ءجون.

 «قازاقستان رەسپۋبليكاسىنىڭ ۇكىمەتى تۋرالى» كونستيتۋتسيالىق زاڭنىڭ 3-1-بابىنا سايكەس قازاقستان رەسپۋبليكاسى ۇكىمەتىنىڭ مۇشەسى قازاقستان حالقىنا جانە پرەزيدەنتىنە انت بەرەدى.

ۇكىمەت مۇشەلەرىنىڭ انتىن رەسپۋبليكا پرەزيدەنتى ءوزى بەلگىلەيتىن تارتىپپەن قابىلدايدى.

ايتا كەتەرلىگى، قازىرگى ۋاقىتتا قوعامدا «ۇكىمەت مۇشەلەرىمەن بىرگە وبلىس اكىمدەرى دە وتستاۆكاعا كەتەدى» دەگەن اقپارات تاراپ ءجۇر. بۇل مۇلدەم جاڭساق پىكىر. ۇكىمەت مۇشەلەرى وتستاۆكاسىنىڭ وبلىس اكىمدەرىنە ەش قاتىسى جوق. ول ەلىمىزدىڭ كونستيتۋتسياسىنىڭ 87-بابىندا تايعا تاڭبا باسقانداي جازىلعان. اتالعان باپتىڭ 4-تارماعىندا «وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ اكىمدەرىن قىزمەتكە تيىسىنشە وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ ءماسليحاتتارىنىڭ كەلىسىمىمەن رەسپۋبليكا پرەزيدەنتى تاعايىندايدى. وزگە اكىمشىلىك- اۋماقتىق بولىنىستەردىڭ اكىمدەرى زاڭدا ايقىندالاتىن تارتىپپەن قىزمەتكە تاعايىندالادى نەمەسە سايلانادى، سونداي- اق قىزمەتىنەن بوساتىلادى. رەسپۋبليكا پرەزيدەنتى ءوزىنىڭ ۇيعارۋى بويىنشا اكىمدەردى قىزمەتتەرىنەن بوساتۋعا حاقىلى»، - دەلىنگەن.

اۆتور: مارلان جيەمباي