12:31, 22 - اقپان 2019 | GMT +6
استانا مەن وسكەمەننىڭ اراسىنداعى جول قىسقارادى
وسكەمەن. قازاقپارات - وبلىس اكىمى دانيال احمەتوۆ ءوڭىر تۇرعىندارى الدىندا بەرگەن ەسەبىندە شار ارقىلى وسكەمەننەن استاناعا جۇرەتىن «تۇلپار-تالگو» جۇردەك پويىزىن قايتا قالپىنا كەلتىرۋ جونىندەگى ساۋالعا جاۋاپ بەردى، دەپ حابارلايدى قازاقپارات ءتىلشىسى.
وسكەمەننەن استاناعا قاتىنايتىن اتالمىش پويىز وسىدان ءبىر جىل بۇرىن توقتاپ قالعان بولاتىن. شار ارقىلى استاناعا 17 ساعاتتا بارىپ جۇرگەن ش ق و تۇرعىندارى قازىر رەسەيدىڭ لوكوت ستانتسياسى ارقىلى تاۋلىكتەن استام جول جۇرۋگە ءماجبۇر.
2018-جىلدىڭ قازان ايىندا ش ق و اكىمى يندۋستريا جانە ينفراقۇرىلىمدىق دامۋ مينيسترلىگىنە وسكەمەن-استانا باعىتىنداعى تەمىرجول قوزعالىسىن قايتا رەتتەۋدى ءوتىنىپ، حات جولداۋدى تاپسىرعان ەدى. ال وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان ءجۇمادىلوۆ اتالمىش ماسەلەنى شەشۋ جولدارىن قاراستىرۋ ۇستىندە ەكەنىن ايتقان بولاتىن.
كەزدەسۋدە ءوڭىر باسشىسى ماسەلەنىڭ جاقىن كۇندەرى تولىعىمەن شەشىلەتىنىن، قازىرگى ۋاقىتتا الدىن الا كەلىسسوزدەر جاسالىپ قويعانىن ايتتى.