قازاقستاندا براكونەرلەردىڭ كولىكتەرى تاركىلەنۋى مۇمكىن
«براكونەرلىك ماقساتتا پايدالانىلعان قارۋ-جاراقتى، ونىڭ ىشىندە اۆتوكولىك قۇرالدارىن مىندەتتى تۇردە تاركىلەۋدى ەنگىزۋ ماسەلەسىن، ونى ودان ارى «قازاقستان رەسپۋبليكاسىنىڭ قىلمىستىق جانە قىلمىستىق ءىس جۇرگىزۋ زاڭناماسىن جەتىلدىرۋ ماسەلەلەرى جونىندەگى كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسىنىڭ اياسىندا جۇزەگە اسىرۋدى وكىلەتتى مەملەكەتتىك ورگاندار قاراستىرىپ جاتىر»، - دەپ اتاپ وتەدى ب. ساعىنتايەۆ.
ونىڭ ايتۋىنشا، اتالعان زاڭ جوباسى ۇكىمەتتىڭ 2019-جىلعا ارنالعان زاڭ شىعارماشىلىق جۇمىستارىنىڭ جوسپارىنا سايكەس بەكىتىلگەن تارتىپپەن وسى جىلدىڭ قىركۇيەك ايىندا پارلامەنت ءماجىلىسىنىڭ قاراۋىنا ەنگىزىلەتىن بولادى.
ەستەرىڭىزگە سالا كەتسەك، 31- قاڭتاردا وتكەن پارلامەنت سەناتىنىڭ جالپى وتىرىسىندا دەپۋتات مۇحتار جۇماعازيەۆ براكونەرلەر كولىكتەرىن تاركىلەپ، ولاردى تابيعات قورعاۋ ينسپەكتورلارىنا بەرۋدى ۇسىنعان بولاتىن.
«براكونەرلىك قىلمىس دالالىق جولدا جۇرۋگە قولايلى ءارى جۇردەك كولىكتەردىڭ كومەگىمەن جۇزەگە اسىرىلادى. زاڭ تالاپتارى بويىنشا ول كولىكتەر قىلمىس قۇرالى بولىپ ەسەپتەلەتىندىكتەن مەملەكەت پايداسىنا تاركىلەنۋى قاجەت. الايدا، قورشاعان ورتاعا، تابيعات يگىلىگىنە ەسەپسىز شىعىن كەلتىرگەن براكونەردىڭ باسىم كوپشىلىگى جەڭىل جازا الۋمەن شەكتەلىپ، كولىك قۇرالدارى كەيىن قايتارىلىپ بەرىلەدى. ەگەر ولاردى كولىكتەرگە يەلىك قۇقىعىنان ايىرىپ، قىلمىسقا قاتىستى كولىكتەر مەن باسقا دا قۇرالدار ەشقانداي ىمىراسىز تاركىلەنسە، براكونەرلەرلىك قىلمىسقا بىردەن-ءبىر توسقاۋىل قويىلار ەدى»، - دەدى سەناتور.
وسى ورايدا، ول براكونەرلىك ارەكەتتەرگە قولدانىلعان كولىكتەردى سوت شەشىمى بويىنشا مەملەكەت پايداسىنا تاركىلەپ، ولاردى جانۋارلار دۇنيەسىن قورعايتىن ورگاندار قۇزىرىنا وتكىزۋدى ۇسىندى.