بوكس پاتشاسى ءاليدىڭ ءومىر جايىندا ايتقاندارى

استانا. قازاقپارات - مۇحاممەد الي -  تورتكۇل دۇنيەگە تانىستىرۋدى قاجەت ەتپەيتىن نار تۇلعا.

بوكس تاريحىندا اتىن التىن ارىپپەن جازىپ قانا قويماي، «بوكس پاتشاسى» اتاعىن دا ەنشىلەپ العان ارداقتى ازامات.

ول بابىندا جۇرگەندە، الەم بويىنشا وعان تەڭ كەلەر قارسىلاس بولماعان. ول شىنىمەندە، ءوز ءىسىنىڭ شەبەرى ەدى.

اليدەن تەك قانا قالاي دۇرىس ۇرۋ كەرەك ەكەنىن عانا ۇيرەنۋگە بولادى دەسەڭىزدەر قاتەلەسەسىزدەر. سەبەبى، الي -  ادامگەرشىلىكتىڭ، الەمدە تەڭدىكتىڭ، بەيبىتشىلىكتىڭ بولعانىن شىن جۇرەگىمەن قالاعان اڭىز ادام. سونىمەن قاتار، ول -  ءوز ومىرىندەگى قاعيدالار جايلى، ءومىر جايلى ءسوز ساپتاعان شەشەن. ولاي بولسا، بوكس پاتشاسى مۇحاممەد ءاليدىڭ ايتقان اقىلدارىنا قۇلاق تۇرەيىك.

1. ۋاقىت شەكتەۋلى، ونى وكىنبەيتىندەي قىلىپ وتكىزىڭىزدەر

ۋاقىتتى ەشكىم ۇستاپ تۇرا المايدى. بۇل تۋرالى «بوكس پاتشاسى» ۋاقىتتىڭ بارىنەن دە قىمبات ەكەنىنە ەشكىمنىڭ دە تالاسى جوعىن ايتىپ، ونىڭ الەمنىڭ اقشاسىنا دا ساتىپ الا المايتىنىمىزدى اينىماس اقيقات رەتىندە كورسەتەدى. سوندىقتان دا، وزىڭىزگە ولشەپ بەرىلگەن ۋاقىتتى تەككە وتكىزبەي، ونى ءماندى دە ماعىنالى، جاقسى نارسەلەرگە جۇمساۋ كەرەكتىگىن تىلگە تيەك ەتەدى. «سوندا، قارتايعان شاعىڭىزدا بۇل دۇنيەگە بەكەر كەلمەگەنىڭىزدى تۇسىنەسىز» دەيدى. ءومىرىمىزدىڭ ءار سەكۋندى ماعىنالى ءوتۋى ءتيىس. «ەلۋدى ەڭسەرگەن ەل اعاسى ومىرگە جيىرما جاستاعى جاس جىگىتشە قاراسا، وندا ول وتىز جىلىن ماعىناسىز وتكىزگەن ەكەن».

«ەگەر مەن قوقىس جيناۋشى بولسام، وندا ونى بارىنەن تەز ءارى تازا ەتىپ جينايتىن ەدىم. ەگەر ءتىلشى بولىپ، مۇحاممەد اليمەن كەزدەسىپ، تىلدەسەتىن ءسات تۋسا، وندا وعان قاتىستى بارلىق اقپاراتتى مەڭگەرىپ، باسقا كوزقاراسپەن قارايتىن ەدىم. بارلىق ىستە مىقتى بولۋ كەرەك»، - دەيدى الي ادام ءوز ءىسىنىڭ شەبەرى بولۋى كەرەك ەكەنىن مەڭزەپ.

2. وزىڭىزگە سەنىمدى بولىڭىز

«سەنىمدىلىكتىڭ ءبىر كۇندە تۋا سالمايتىنى بەلگىلى. ونى الدىمەن بويعا ءسىڭىرۋ قاجەت. ەشكىم دە تاكاپپار ادامدى ۇناتپايدى، ءبىراق ءبىر بۇرىشتا جاسقانشاقتاپ قاراپ تۇرۋ -  بۇدان دا جامان»، - دەپ، ءوز-وزىنە سەنۋدىڭ بەلگىلى ءبىر مولشەرى بولاتىنىن ەسكەرتەدى. سەنىمدىلىكتىڭ ماعىناسى كەڭ جانە ونى اركىم ءار ءتۇرلى تۇسىنەدى. ال الي بولسا، تاۋەكەلدىلىكپەن ۇشتاستىرادى. «تونگەن قاۋىپتىڭ كۇشتىلىگىنە قاراماي، ماقساتى ءۇشىن تاۋەكەلگە بەل بايلاماعان ادامنىڭ بۇل ومىردە ەشتەڭەگە قولى جەتپەيدى»، دەيدى بىلعارى قولعاپ شەبەرى.

3. جاتتىعۋ كىمگە بولسا دا وڭاي سوقپايدى

«كوپتەگەن ادامدار اتاقتى سپورتشىلار جاتتىققاندى جاقسى كورىپ، سودان ءلاززات العاندىقتان عانا ۇلكەن جەتىستىكتەرگە جەتتى دەپ ويلايدى. ەگەر، قانداي دا ءبىر سپورتشى «مەن جاتتىعۋ جۇمىستارىن جاساعاندا، تۇك تە قينالمايمىن» دەسە، وندا وعان سەنبەڭىز، ولار وتىرىك ايتادى» دەيدى. جانە جاتتىعۋ جايىندا: مەن جاتتىعۋدىڭ ءار مينۋتىن جەك كوردىم. ءبىراق، ءوز وزىمە بىلاي دەدىم: «قازىر قينال دا، سوسىن ءومىر بويى جەڭىمپاز دەگەن اتاقپەن ءومىر ءسۇر».

ءسىز اپتاسىنا ءۇش رەت سپورت زالعا بارىپ قانا ەشقاشان جەڭىمپاز بولا المايسىز. دەگەنمەن، جەڭىمپاز تەك سپورت الاڭىندا عانا بولمايتىنىن دا ەستەن شىعارماڭىز. جۇرەگىڭىز قالاعان ىسكە التىن ۋاقىتىڭىز بەن بار كۇشىڭىزدى سالىپ جانە ونىڭ بيىكتىگىنە قاراماي، شىڭىن باعىندىرۋىڭىز كەرەك. قانداي جاعداي بولسا دا، ارتقا بۇرىلماڭىز، تەك قانا العا ادىمداي بەرىڭىز.

4. جەڭىلىسكتىڭ دە ءدامىن سەزۋ كەرەك

الي شارشى الاڭداعى كەزدەسۋىنىڭ 56 سىن تازا جەڭىسپەن، 5 ءۋىن جەڭىلىسپەن جانە 0 ءىن تەپە-تەڭ بولىپ اياقتاعان. بۇل -  تاماشا كورسەتكىش. دەگەنمەن، ومىرىندە تەك بەس-اق رەت جەڭىلگەن سپورتشى ءۇشىن ءار جەڭىلىسى تاۋداي قايعىمەن تەڭ. 1973-جىلى دجوردج فورمانمەن جۇدىرىقتاسار الدىندا، بىلاي دەگەن: مەن ەشقاشان جەڭىلىس تۋرالى ويلاماعان ەدىم، بۇگىن العاشقى رەت ىشىمدەگىنى ايتايىن. ءبىز بارلىعىمىز جەڭىلەمىز جانە وعان بوي ۇيرەتۋىمىز قاجەت. جەڭىلىس ءدامى وتە اششى، دەگەنمەن، ءبىزدى مىقتى قىلىپ، كۇش بەرىپ، قايرايتىن دا جەڭىلىس. مۇنى ءبارىڭىز بىلەتىن شىعارسىزدار؟

5. ءجۇز تەڭگەڭ بولعانشا ءجۇز دوسىڭ بولسىن

ومىردە بيىككە كوتەرىلگەن سايىن شىن دوستاردىڭ سانى ازايا بەرەتىنىن كوپتەگەن ادامدار العا تارتادى. ال الي بولسا، «وسىنشاما جەتىستىككە جەتكەنىم - سول جان دوستارىمنىڭ ارقاسى» دەيدى. ومىردە ساتىپ الۋعا جانە ساتۋعا بولمايتىن بىردەن-ءبىر قىمبات سىيلىق شىنايى دوستىق دەيدى.

ەگەر ءسىز جاراتۋشىدان ءبىر نارسە سۇراساڭىز، وندا العاشقى كەزەكتە اقشا ەمەس، التىن ەمەس، شىنايى دوستاردىڭ ماحابباتىن سۇراڭىز. ءبىراق، دوستىققا دا باعبان بولماساڭىز، باقشادان جەمىس كۇتپەڭىز. كەيدە دوستار اراسىنداعى سىيلاستىق، جىڭىشكەرىپ-جىڭىشكەرىپ جىپكە اينالادى. جانە ءبىر عانا ءساتسىز قيمىل ونى ماڭگىلىككە ءۇزىپ جىبەرۋى مۇمكىن. سوندىقتان، وعان ءاردايىم جۇرەك كوڭىلىمەن قاراڭىز جانە ءۇزىلىپ كەتۋىنە جول بەرمەڭىز، ويتكەنى دوستىق باعالى.

دەرەككوزى: «الەۋمەتتىك جەلى بەتتەرىنەن»