ا ق ش- تىڭ بارلىق قالالارىندا بولعان اقتوبەلىك جىگىت تۋرالى نە بىلەمىز؟

 استانا. قازاقپارات - اقتوبەلىك دجاليل مارات ۇلى الىستاعى امەريكاعا اتتانىپ، سول جاقتا قىزمەت ەتىپ جۇرگەن قازاق جاستارىنىڭ ءبىرى.

ول سوندا تۇرىپ جاتقان بەس جىل ۋاقىت ىشىندە ا ق ش- تىڭ بارلىق قالالارىن ارالاپ ۇلگەرگەن دەپ جازادى NUR. KZ.

جاس مامان اقتوبەنىڭ جۇبانوۆ اتىنداعى ۋنيۆەرسيتەتىن مۇناي جانە گاز ينجەنەر تەحنولوگى ماماندىعى بويىنشا ءتامامداعان. ا ق ش- قا وسىدان بەس جىل بۇرىن اتتانعان ول، بۇگىندە لوگيستيكا سالاسىندا قىزمەت ەتىپ جاتقان كورىنەدى.

«جىل سايىن ا ق ش دۇنيەجۇزى بويىنشا ەلۋ مىڭ ادامعا سوندا تۇرۋعا مۇمكىندىك بەرەتىن لوتورەيا ويناتاتىنىن كوپشىلىك بىلەدى. ءبىز سول لوتورەيانى ۇتىپ الىپ، ا ق ش- قا وسىدان بەس جىل بۇرىن كەلىپ قالدىق. قازىر لوگيستيكا سالاسىندا جۇمىس ىستەپ ءجۇرمىن، جولداسىم بولسا IT مامانى.

باستاپقىدا ءتىلدى ءجوندى بىلمەي قاتتى قينالعانىمىز راس. ءبىراق قازىر شۇكىر، ول قيىندىقتىڭ ءبارى ارتتا قالدى. مۇندا قازاق جاستارى وتە كوپ. وسىندا ون ءبىر جىل بويى تۇرىپ جاتقان دوسىم، بەس اي بۇرىن كەلگەن ستۋدەنت دوسىم، سونداي-اق، التى ايعا جۇمىس ىستەۋگە كەلگەن جىگىتتەر دە بار»، - دەپ اڭگىمەسىن باستادى قازاق جىگىتى.

دجاليلدىڭ ايتۋىنشا، امەريكالىقتار ءوز ەلىنىڭ اسقان پاتريوتى بولادى ەكەن.

«امەريكا حالقىنىڭ تاڭ قالدىراتىنى - ولار ءوز ەلدەرىنىڭ ناعىز پاتريوتى بولادى. بۇل جەردە پاتريوتتىق سەزىم جاي عانا ءسوز ەمەس، ول ءوز ەلىن سىيلاۋ، ءوز مەكتەبىن، ءوزى تۇرعان جەردەگى فۋتبول كلۋبىن جاقسى كورۋ بولىپ تابىلادى. لوگيست بولىپ جۇمىس ىستەگەن سوڭ، بۇكىل ا ق ش- تى ارالادىم.

نەگىزى امەريكادا بوسقىندار كوپ، سوندىقتان ءار ەلدىڭ اسحاناسىنان ءدام تاتقىزاتىن ءدامحانالار دا كوپ. امەريكالىقتار تەك Fast Food-پەن تاماقتانادى دەگەن جالعان تۇسىنىك.

كوپتەگەن ەلدەردىڭ تاعامدارىنان ءدام تاتتىق، ازىرگە اۋىلدىڭ تاعامىن ساعىنىپ كورمەپپىز. سەبەبى ءبىز تۇراتىن جەردە قازاق فەرماسى بار. سول جەردەن جىلقى ەتى مەن قايماق الامىز. سول سياقتى وزبەك جانە ۇيعىرلاردىڭ مەيرامحانالارى بار. ءبىراق مۇنداعى ەتتىڭ ءدامى ءبىزدىڭ ەلدەگى ەتكە قاراعاندا باسقاشا بولادى»، - دەپ ا ق ش جايلى اسەرلەرىمەن ءبولىستى اقتوبەلىك ازامات.

ەكى بالانىڭ اكەسى كوپ ۇزاماي ەلگە قايتاتىنىن دا ايتتى.

«ارينە مۇندا قالمايمىز، ەلگە قايتامىز. الدىمىزدا ءتۇرلى جوسپارلار مەن ماقساتتار بار. جىراقتا جۇرگەن سوڭ، ەلىمىزگە تىنىشتىق پەن بەيبىتشىلىك تىلەگىم كەلەدى. باستىسى باسىمىز امان، باۋىرىمىز ءبۇتىن بولسىن»، - دەپ اڭگىمەسىن اياقتادى اقتوبەلىك جىگىت.