فۋتبول: «قايسار» تۇرىكمەن كومانداسىنان باسىم ءتۇستى

قىزىلوردا. قازاقپارات - قىزىلوردانىڭ «قايسارى» تۇركياداعى وقۋ-جاتتىعۋ جيىنىندا بۇگىن سوڭعى كەزدەسۋىن وتكىزدى.

بۇل جولى تۇرىكمەنستاننىڭ «التىن اسىر» كومانداسىمەن كەزدەستى، دەپ حابارلايدى قازاقپارات ءتىلشىسى.

«التىن اسىر» كومانداسى 2008-جىلى قۇرىلعان. 2014-جىلدان بەرى فۋتبولدان ءوز ەلىنىڭ بىرىنشىلىگىندە بەس مارتە چەمپيون اتانىپ ۇلگەردى. سونداي-اق، اتالمىش كوماندا 2010-جىلى كۇمىس، 2013-جىلى قولا مەدال العان ەدى. اتالمىش كلۋبتىڭ بۇدان باسقا دا جەتىستىكتەرى از ەمەس.

«قايسار» جىگىتتەرى بۇگىن وتە سەنىمدى وينادى. قارسىلاستار قاقپاسى ماڭىندا ءجيى شابۋىل ۇيىمداستىردى. وسىنداي ءساتتىڭ بىرىندە «قايساردىڭ» پورتۋگالدىق جارتىلاي قورعاۋشىسى كارلوس ميگەل (كارليتوس) مەرگەندىك كورسەتتى. كوماندا قۇرامىنا بيىل قوسىلعان مارات حايرۋللين دە بۇگىنگى كەزدەسۋدەن قۇر كەتپەي، قارسىلاستار قاقپاسىن ءدال كوزدەي ءبىلدى. بۇدان كەيىن براتيسلاۆ پۋنوشيەۆاتس قانجىعاسىن مايلاسا، سوڭعى گولدى مارك گۋرمان سوقتى. وسىلايشا «قايسار» «التىن اسىر» كومانداسىن 4:0 ەسەبىمەن جەڭدى.

ەسكە سالا كەتەلىك، ەكىنشى وقۋ-جاتتىعۋ جيىنى بارىسىندا قىزىلوردالىق كلۋب بولگاريانىڭ «تسارسكو سەلو، ۋكراينانىڭ «دەسنا» جانە رەسەيدىڭ «كرىليا سوۆەتوۆ»، «بالتيكا»، گرۋزيالىق ۆ ي ت- «دجوردجيا» كومانداسىنان جەڭىلىپ قالعان ەدى. ال رەسەيدىڭ «نيجنيي نوۆگورود» كومانداسىنان باسىم بولسا، گرۋزيانىڭ «سابۋرتالو» كومانداسىمەن تەڭ ءتۇستى.

ال العاشقى وقۋ-جاتتىعۋ جيىنى بارىسىندا «قايسار» 22- قاڭتاردا ۋكراينانىڭ «وليمپيك» كومانداسىمەن جولداستىق كەزدەسۋ وتكىزىپ، بۇل ويىندا جەرلەستەرىمىز قارسىلاسىنان 1:3 ەسەبىمەن جەڭىلىپ قالدى.

«قايسار» ەندى ەلگە قايتادى. قىزىلوردا قالاسىنداعى العاشقى دايىندىعىن 27- اقپاندا باستايدى دەپ جوسپارلانىپ وتىر.

ءبىز بۇدان بۇرىن «قايساردىڭ» قۇرامىنا پورتۋگالدىق فۋتبولشى قوسىلعانىن حابارلاعان ەدىك.