قازاقستاندىق رەجيسسەردىڭ كارتيناسى ءۇندىستانداعى كينوفەستيۆالگە قاتىسادى

 الماتى. قازاقپارات - قازاقستاندىق رەجيسسەر ءادىلحان ەرجانوۆتىڭ «تۇنگى قۇداي» كينوكارتيناسى ءۇندىستانداعى كينوفەستيۆالدە ازيالىق كونكۋرستىق باعدارلاماعا قاتىسادى، دەپ حابارلايدى قازاقپارات «قازاقفيلم» كينوستۋدياسىنا سىلتەمە جاساپ.

حالىقارالىق كينوفەستيۆال 21-28 - اقپان كۇندەرى ءۇندىستاننىڭ بانگالور قالاسىندا وتەدى. Bengaluru International Film Festival-دا ازيالىق جانە ءۇندى فيلمدەرىنىڭ كونكۋرستىق باعدارلامالارى بار. سونداي- اق، كونكۋرستان تىس باعدارلاماعا تاعى ءبىر قازاقستاندىق رەجيسسەر ەمير ءبايعازيننىڭ «وزەن» كارتيناسى قاتىسادى.

ايتا كەتەيىك، «تۇنگى قۇدايدىڭ» الەمدىك پرەمەراسى 2018 -جىلدىڭ ءساۋىر ايىندا ماسكەۋ حالىقارالىق كينوفەستيۆالى اياسىندا ءوتتى. ودان بولەك، فيلم پاريجدەگى L'Etrange Festival دە، رەسەيدەگى «كراي سۆەتا» حكف، يندونەزياداعى Jogja-NETPAC Asian Film Festival جانە الماتىداعى شاكەن ايمانوۆ اتىنداعى ح ك ف- دا كورسەتىلگەن بولاتىن.

 

بۇعان دەيىن رەجيسسەردىڭ 2016 -جىلى جارىق كورگەن «قاراتاس اۋىلىنداعى وبا» كينوكارتيناسى روتتەردامداعى 45- NETPAC حالىقارالىق كينوفەستيۆالىندە قازىلار القاسىنىڭ سىيلىعىن جەڭىپ الدى. ال «الەمگە جىلى بەيجايلىق» فيلمى 2018 -جىلعى كانن كينوفەستيۆالىنىڭ «ەرەكشە كوزقاراس» كونكۋرستىق باعدارلاماسىنا ەندى.