استانادا قانداي ماماندىقتار سۇرانىسقا يە

استانا. قازاقپارات - استانادا ءتورت مىڭنان استام بوس جۇمىس ورنى بار، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

حالىقتى جۇمىسپەن قامتۋ ورتالىعىنىڭ اقپاراتىنا سايكەس، قازىرگى تاڭدا استانادا تاربيەشىلەر، ناۋبايشىلار، اسپازدار، تىگىنشىلەر، شاشتارازدار، ەلەكتر مەن گاز دانەكەرلەۋشىلەر، ساۋدا مەنەدجەرلەرى، باقىلاۋشىلار، كاسسيرلەر مەن داياشىلار سۇرانىسقا يە.

«قازىر ءتورت مىڭنان استام بوس جۇمىس ورنى بار. الايدا، اتالعان سالالاردا دايىن مامانداردىڭ تاپشىلىعى بايقالادى. جاستار ءوز ماماندىقتارى بويىنشا جۇمىسقا ورنالاسپايدى. باستى سەبەپ - ماماندىقتى دۇرىس تاڭداماۋ»، - دەلىنگەن ورتالىق حابارلاماسىندا.

وسى رەتتە حالىقتى جۇمىسپەن قامتۋ ورتالىعى قىسقا مەرزىمدى كۋرستاردى ۇيىمداستىرۋدا. ماماندىعىن وزگەرتكىسى كەلگەن ءار ادام جاس ەرەكشەلىگىنە قاراماستان، باسقا ماماندىققا قايتا وقي الادى. وقۋ ماماندىققا بايلانىستى 1 ايدان 3 ايعا دەيىن جالعاسادى.

2018 -جىلى استانادا 700-گە جۋىق ادام قايتا وقىتۋ كۋرستارىنان ءوتتى. ولاردىڭ %70 تۇراقتى جۇمىسقا ورنالاستى.