ارال تەڭىزىنىڭ قۇرعاپ كەتكەن اۋماعىندا ورمان پايدا بولدى
بۇل تۋرالى پارلامەنت ماجىلىسىندە «ارال ءوڭىرىنىڭ ەكونوميكالىق، ەكولوگيالىق جانە الەۋمەتتىك ماسەلەلەرىن زاڭنامالىق رەتتەۋ» تاقىرىبىندا وتكەن دوڭگەلەك ۇستەل بارىسىندا ق ر پارلامەنتى ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ ءتوراعاسى گلەب شەگەلسكي ءمالىم ەتتى، دەپ حابارلايدى قازاقپارات ءتىلشىسى.
ماجىلىسمەننىڭ ايتۋىنا قاراعاندا، ارال وڭىرىندە وسى ۋاقىتقا دەيىن 50 مىڭ گەكتارلىق جايىلىم جەر قالپىنا كەلتىرىلگەن.
«تەڭىزدىڭ تارتىلىپ قالعان بولىگىندە ءوسىپ شىققان ورماننىڭ اۋماعى 300 مىڭ گەكتارعا جەتتى. وسىنىڭ ءبارى الەۋمەتتىك-ەكونوميكالىق تيىمدىلىكتى كورسەتەدى»، - دەيدى گلەب شەگەلسكي.
الايدا دەپۋتاتتىڭ ايتۋىنا قاراعاندا، ايماقتىڭ تۇراقتىلىعى ءۇشىن ءالى دە ءبىرشاما جۇمىس جۇرگىزۋ كەرەك.
«ءيا، ءبىز كىشى ارالدى ساقتاپ قالا الدىق. ءبىراق، الداعى ۋاقىتتا وسى ايماقتىڭ سۋ رەسۋرسىن ساقتاپ قالۋدى، سالالاردىڭ تۇراقتى دامۋىن، سونىڭ ىشىندە بالىق شارۋاشىلىعىنىڭ وركەندەۋىن ويلاستىرۋ كەرەك»، - دەيدى دەپۋتات.
كەلتىرىلگەن مالىمەتتەرگە قۇلاق اسساق، قازىرگى تاڭدا ايماقتاعى بالىق زاۋىتتارىنىڭ جارتىسى عانا تولىق قۋاتتا جۇمىس جۇرگىزىپ وتىر.
«بۇكىل وندىرىستىك قۋاتتى قالاي ىسكە قوسۋدى، تەڭىزدىڭ بيورەسۋرسىن ساقتاي وتىرىپ، كاسىبي بالىق شارۋاشىلىعىن وركەندەتۋدى، بالىق ءوندىرىسىنىڭ تولىق تسيكلىن قالاي قۇرۋدى ويلاستىرۋىمىز كەرەك»، - دەيدى دەپۋتات.
ەسكە سالا كەتسەك، بۇعان دەيىن دەپۋتات گلەب شەگەلسكي قازاقستان ارال تەڭىزىنىڭ سولتۇستىك بولىگىن قالاي ساقتاپ قالعانىن ايتىپ بەرگەن بولاتىن.