قازاقستان ارال تەڭىزىنىڭ سولتۇستىك بولىگىن قالاي ساقتاپ قالدى؟
پارلامەنت ءماجىلىسىنىڭ قابىرعاسىندا ارال ماسەلەسىنە قاتىستى وتكەن دوڭگەلەك ۇستەلدە بۇل تۋرالى ق ر پارلامەنتى ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ ءتوراعاسى گلەب شەگەلسكي ايتىپ بەردى، دەپ حابارلايدى قازاقپارات ءتىلشىسى.
ەسكە سالا كەتسەك، بۇگىن پارلامەنت ماجىلىسىندە ءبىر توپ دەپۋتاتتار مەن ءارتۇرلى مينيسترلىك وكىلدەرى ارال تەڭىزىنىڭ تارتىلۋى ماسەلەسىن تالقىلاعان بولاتىن.
«ارال ءوڭىرىنىڭ ەكونوميكالىق، ەكولوگيالىق جانە الەۋمەتتىك ماسەلەلەرىن زاڭنامالىق رەتتەۋ» تاقىرىنداعى دوڭگەلەك ۇستەل بارىسىندا ق ر پارلامەنتى ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ ءتوراعاسى گلەب شەگەلسكي اتالمىش ەكولوگيالىق ماسەلەنى شەشۋ باعىتىنداعى جۇمىستار تۋرالى اڭگىمەلەدى.
«پرەزيدەنت نۇرسۇلتان نازاربايەۆتىڭ باستاماسىمەن ءارى تۇراقتى باقىلاۋى بويىنشا 2005-جىلى كوكارال سۋ قويماسى سالىنعان ەدى. وسىنىڭ ارقاسىندا كىشى ارالدا سۋ دەڭگەيى كوتەرىلىپ، سۋدىڭ مينەراليزاتسياسى تومەندەدى»، - دەيدى دەپۋتات.
گلەب شەگەلسكي اتالمىش جوبا بۇكىل الەمدىك بانكتىڭ قارجىلاي قولداۋىنىڭ ارقاسىندا ىسكە اسقانىن ەسكە سالدى. ارال تەڭىزىنىڭ ماسەلەسىن رەتتەۋگە سونىمەن بىرگە ب ۇ ۇ، يۋنەسكو، ە ى ق ۇ، ي ۋ ن ي س ە ف سەكىلدى حالىقارالىق قاۋىمداستىقتار دا اتسالىسقان.
«1993-جىلدان 2017-جىلعا دەيىن ارالدىڭ قازاقستاندىق بولىگىندە 905 ميلليون تەڭگە بولاتىن 110 جوبا جۇزەگە اسىرىلدى. اتالمىش قاراجاتتىڭ ۇشتەن ءبىرى دونورلىق قاراجات ەكەنىن ايتا كەتۋ كەرەك. وسى جۇمىستاردىڭ ارقاسىندا تەڭىزدىڭ سولتۇستىك بولىگىن ساقتاپ قالۋ مۇمكىندىگى تۋدى. كىشى ارال اتانعان ول جەردە قازىرگى ۋاقىتتا بالىق شارۋاشىلىعى جۇمىس ىستەپ تۇر. ارال اۋدانىنىڭ وزىندە عانا 16 شاعىن وڭدەۋ ونەركاسىبى جۇمىس ىستەيدى. ول جەردە جىلىنا 8 مىڭ تونناعا دەيىن بالىق اۋلانىپ، بالىقتىڭ باسىم بولىگى ەكسپورتقا شىعارىلىپ جاتىر»، - دەدى گلەب شەگەلسكي.