قازاقستاندىق قوس بوكسشى الماتىدا تيتۋلدىق جەكپە-جەكتەرىن وتكىزەدى

استانا. قازاقپارات - قازاقستاندىق بوكس مەكتەبىنىڭ تۇلەكتەرى ايدوس ەربوسىن ۇلى (10-0،  8 ك و) مەن نۇرسۇلتان جاڭابايەۆ (6-0، 4 ك و) تيتۋلدىق ايقاستارىن وتكىزەدى.

بوكس كەشى 24- ناۋرىز كۇنى الماتىدا بولادى ، دەپ حابارلايدى قازاقپارات.

ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسى» پاراقشاسىنداعى اقپاراتقا سايكەس، قوس بوكسشىنىڭ مۇددەسىن Suleimen Promotions پروموۋتەرلىك كومپانياسى قورعايدى.

سپورتشىلاردىڭ رەسمي وكىلدەرىنىڭ ايتۋىنشا، ايدوستىڭ جەكپە-جەگىندە WBO Global, WBC Asia جانە WBA International تيتۋلدارى ساراپقا سالىنادى، ال نۇرسۇلتان جاڭابايەۆ WBA Intercontinental بەلدىگىنە تالاسادى.

«ولاردىڭ قارسىلاستارى ازىرگە بەلگىسىز. انىعى، بوكس كەشى «الماتى ارەنا» مۇز ايدىنىندا، ناۋرىز مەيرامىنا وراي ۇيىمداستىرىلادى»، - دەلىنگەن جازبادا.