قازاقستان ەكسپورتشىلارىنا ق ح ر، ب ا ءا جانە يران نارىقتارىنا شىعۋ جەڭىلدەيدى

استانا. قازاقپارات - قازاقستان ەكسپورتشىلارىنا قىتاي، بىرىككەن اراب امىرلىكتەرى مەن يران نارىقتارىنا شىعۋ جەڭىلدەيدى. بۇل تۋرالى بۇگىن ق ر يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى جەڭىس قاسىمبەك ايتتى، دەپ حابارلايدى قازاقپارات ءتىلشىسى.

 ءمينيستردىڭ ايتۋىنشا، ەكسپورتقا باعدارلانعان كومپانيالارعا مەملەكەت باسشىسىنىڭ تاپسىرماسىنا سايكەس قارجىلىق قولداۋدان تىس كومەك شارالارى كورسەتىلەدى.

 «ەكسپورتتاۋشىلارعا قولداۋدىڭ سەرۆيستىك شارالارىن كۇشەيتۋ اياسىندا ق ح ر، ب ا ءا جانە يراننان ينسپەكتسيالىق كوميسسيالاردى قازاقستاندىق ەكسپورتتاۋشى كاسىپورىندارعا شاقىرۋ ارقىلى ولاردىڭ نارىقتارىنا وڭاي شىعۋدى قامتاماسىز ەتۋ جوسپارلانعان»، - دەدى ج. قاسىمبەك.

ونىڭ دەرەگىنشە، 2019-2021 -جىلدارى ەكسپورتتاۋشىلاردى قولداۋ شارالارىن كۇشەيتۋ ءۇشىن 500 ميلليارد تەڭگە جۇمسالادى. اتالعان سومانىڭ 470 ميلليارد تەڭگەسى قارجىلىق، ال 30 ميلليارد تەڭگەسى قارجىلىق ەمەس شارالاردى قۇرايدى. قارجىلىق جانە سەرۆيستىك شارالاردى كۇشەيتۋ اكىمشىلىك جانە ساۋدا كەدەرگىلەرىن ەڭسەرۋگە مۇمكىندىك بەرەدى. بيزنەسكە الەۋەتتى ساتىپ الۋشىنى تاڭداۋعا، كولىك شىعىندارىن تومەندەتۋگە جول اشادى.

«جوعارىدا اتالعان شارالاردى تابىستى جۇزەگە اسىرعان جاعدايدا شيكىزاتتىق ەمەس تاۋار ەكسپورتىنىڭ كولەمىن 2020 -جىلعا قاراي 1,5 پايىزعا، 22,4 ميلليارد دوللارعا جەتكىزۋ جوسپارلانادى»، - دەدى مينيستر.

اۆتور: مارلان جيەمباي