الاياقتىق ءۇشىن ۇستالعان اكتەر تانىمال قازاقستاندىق فيلمنىڭ باستى ءرولىن سومداعان

الماتى. قازاقپارات - الاياقتىق ارەكەتى ءۇشىن ۇستالعان تيمۋر ايداربەكوۆ بەلگىلى رەجيسسەر ەمير بايعازيننىڭ «ۇندەستىك ساباقتارى» فيلمىندە باستى ءرولدى سومداعان، دەپ حابارلايدى قازاقپارات ءتىلشىسى.

ايتا كەتسەك، 21 جاستاعى تيمۋر ايداربەكوۆتىڭ ۇستالعانى تۋرالى جازعان ەدىك.

ول وقۋشىلاردى الداعانى ءۇشىن ءىستى بولدى. ءبىر جاعدايدا ول ۆيدەو جۇكتەپ الامىن دەگەن جەلەۋمەن 15 جاستاعى وقۋشىدان نوۋتبۋك الىپ شىعۋىن سۇراعان. وسىلايشا بالانى الداپ دۇكەنگە كىرىپ كەتىپ، دۇكەننىڭ ارعى ەسىگىنەن شىعىپ كەتكەن. نوۋتبۋكتى 15 مىڭ تەڭگەگە ساتىپ جىبەرگەن. تاعى بىردە قىز بالانىڭ تەلەفونىن الداپ الىپ كەتكەن.

جاس اكتەر بالالار ۇيىندە وسكەن. بالانىڭ بويىنداعى تالانتتى ارتحاۋس جانرىنىڭ رەجيسسەرى ەمير بايعازين بايقاعان.

13 جاسىندا تيمۋر ايداربەكوۆ «ۇندەستىك ساباقتارى»، ودان كەيىنىرەك «جارالى پەرىشتە» فيلمدەرىندە ويناعان.

ەكى كينوتۋىندىنىڭ ەكەۋى دە كوپتەگەن الەمدىك كينوفەستيۆالدەردە توپ جاردى.

جاس اكتەر 2013-جىلى فرانسيانىڭ امەن قالاسىندا وتكەن 33-حالىقارالىق كينوفەستيۆالدە ەڭ ۇزدىك ەرلەر ءرولى ءۇشىن ماراپات العان.

ەمير بايعازينمەن بىرگە قىزمەت ىستەيتىن قويۋشى-سۋرەتشى سەرگەي كوپىلوۆ ەكى كارتيناعا دا رەجيسسەر ءومىردىڭ قيىندىعىن كورگەن جاستاردى ىزدەگەنىن ايتتى.

ولار تيمۋر ايداربەكوۆتى بالالار ۇيىنەن تاپقان.

«ۇندەستىك ساباقتارىن» تۇسىرگەن كەزدە مەن بايعازينمەن جۇمىس جاسامادىم. مەن «جارالى پەرىشتە»، «جۇلدىزدارعا قاراعىڭىز كەلە مە؟» كينولارىندا بىرگە بولدىم. «جارالى پەرىشتەدە» تيمۋر توكسيكوماندى وينايدى. مەن ونىڭ تاعدىرى قيىن دەپ ەستىگەنمىن. ينتەرناتتا وسكەن. ول وتە پىسىق بالا. ءتۇسىرىلىم جۇمىستارى بىتكەن سوڭ دا 2 اپتاداي جارىقتاندىرۋشى بولىپ جۇمىس ىستەدى. سوسىن ول جوعالىپ كەتتى. 2017-جىلى «جۇلدىزدارعا قاراعىڭىز كەلە مە؟» فيلمىنە ءتۇسىرۋ ءۇشىن شاقىردىق. الدىن الا تۇسىرىلىمدەرگە كەلىپ ءجۇردى. كەيىن تاعى جوعالىپ كەتتى. بىلۋىمشە، ول ينتەرناتتا بۇرىننان بەرى تۇرمايدى»، - دەدى سەرگەي كوپىلوۆ.

2014-جىلى 17 جاستاعى تيمۋر ايداربەكوۆ ينتەرناتتان قاشىپ كەتپەك بولعان. بىرنەشە رەت قاشۋعا تىرىسقانى ءۇشىن تاربيەسى قيىن بالالاردى بەيىمدەۋ ورتالىعىنا ءتۇستى.

«ول «جارالى پەرىشتەدە» ءتۇسىپ جۇرگەندە قاشىپ كەتكەن. ونى تارازدان تاۋىپ الدى. مىنەزى وتە قيىن بالا. تاربيەگە كونبەيتىن. بەتىنە تاتۋ جاساعانى جايلى ەستىدىم. قولىنىڭ جىمسىماسى بارىن بۇرىننان بىلەمىز. سودان قايتىپ اكەلمەدى. «قازاق فيلمدە» دە بىرەۋدىڭ تەلەفونىن سۇراي تۇرىپ، سول بەتى قايتارمادى. ونىڭ اكتەرلىك پوتەنتسيالى مىقتى بولاتىن. ءبىراق، اياق استىنان جوعالىپ كەتەتىن اداممەن جۇمىس ىستەۋ مۇمكىن ەمەس»، - دەدى ول.

ايتا كەتۋ كەرەك، قازاقستاننىڭ ەڭ اتاقتى فيلمى «ۇندەستىك ساباقتارى» حالىقارالىق كينوفەستيۆالدەردەن 1 جىلدا 30 عا جۋىق جۇلدە العان. فيلم قازاق كينوسىندا تۇڭعىش رەت ەڭ جوعارعى «ا» ساناتىنداعى بەرلين كينوفەستيۆالىنىڭ بايقاۋ باعدارلاماسىنا قاتىسىپ قانا قويماي، ودان «كۇمىس ايۋ» جۇلدەسىن ولجالاعان. بۇل فيلمنىڭ پروكاتى قازاقستاندا 5- جەلتوقساندا باستالدى.