ناتو: پۋتيننىڭ وداق ەلدەرىنە سەس كورسەتۋى ورىنسىز
بۇعان دەيىن اق ءۇي ا ق ش 2 - اقپاننان باستاپ ورتا جانە قىسقا قاشىقتىققا ۇشاتىن زىمىرانداردى جويۋ تۋرالى كەلىسىمنەن شىعۋ پروتسەسىن باستايدى دەپ مالىمدەگەن ەدى. ماسكەۋ بۇعان جاۋاپ رەتىندە رەسەيدىڭ دە كەلىسىمنەن شىعاتىنىن ايتقان.
جولداۋىندا ا ق ش شەشىمىنە قاتىستى سويلەگەن پۋتين «رەسەي ا ق ش پەن ونىڭ وداقتاستارىنىڭ قارۋ- جاراعىن عانا ەمەس، تەرريتورياسىنداعى شەشىم قابىلدايتىن ورتالىقتارىن دا كوزدەيتىن زىمىراندار جۇيەسىن دامىتادى» دەگەن.
ناتو جاۋابىندا «ۆاشينگتوننىڭ كەلىسىمنەن شىعۋىنا ماسكەۋ كىنالى» دەپ مالىمدەدى. ۇيىم رەسەيدى كەلىسىمدى ساقتاۋعا شاقىردى. ناتو وكىلىنىڭ سوزىنشە، وداق «جاڭا قارۋ- جاراق جارىسىن قالامايدى جانە ەۋروپادا جاڭا يادرولىق قارۋ جاساۋدى جوسپارلاپ وتىرعان جوق».
1987 - جىلى ا ق ش پەن سوۆەت وداعىنىڭ باسشىلارى قول قويعان «ورتا جانە قىسقا قاشىقتىققا ارنالعان يادرولىق زىمىرانداردى جويۋ» كەلىسىمى ەۋروپا مەن وزگە دە ايماقتاعى بەيبىتشىلىكتىڭ كەپىلى رەتىندە قابىلدانىپ كەلگەن. ءبىراق سوڭعى ۋاقىتتا ۆاشينگتون مەن ماسكەۋ بۇل قۇجاتقا قاتىستى كەلىسپەي قالىپ جۇرگەن.
ا ق ش پەن ناتو 9M729 اتتى يادرولىق قاناتتى زىمىران جاساۋ ارقىلى رەسەي تاريحي كەلىسىمدى بۇزدى دەپ ايىپتاعان. ال رەسەي «بۇل زىمىراننىڭ ۇشۋ الىستىعى 500 دەن اسپايدى، سايكەسىنشە كەلىسىم شارتتارىن بۇزعان جوقپىز» دەگەن.