قازاق بوكسشىلارى بولگارياداعى تۋرنيردىڭ فينالىندا جاپپاي ۇتىلىپ قالدى

استانا. قازاقپارات - بولگارياداعى سوفيا قالاسىندا بوكستان «ستراندجا» حالىقارالىق تۋرنيرى اياقتالدى.

الايدا، قازاقستاننىڭ ۇلتتىق قۇراماسى بۇل دودادا التىن جۇلدەدەن قاعىلدى. ءبىر ەمەس بەس مارتە. تۋرنيردىڭ فينالىنا جولداما العان بەس قازاقستاندىق بوكسشى دا ەلگە كۇمىسپەن ورالدى دەپ حابارلايدى Olympic.kz.

49 كەلىدەگى تەمىرتاس ءجۇسىپوۆ ءۇندىستاندىق اميتتەن 0:5 ەسەبىمەن جەڭىلگەن.

60 كەلىدەگى زاكىر سافيۋللين رەسەي بوكسشىسى ارتۋر سۋحبانكۋلوۆقا ەسە جىبەردى. رەسەيلىك بوكسشى 4:1 ەسەبىمەن جەڭىسكە جەتىپ، وتانداسىمىزدى التىننان ايىردى.

64 كەلىدەگى ءساناتالى تولتايەۆ پەن رەسەيلىك الەكسەي مازۋر اراسىنداعى تارتىستى جەكپە-جەك 3:2 ەسەبىمەن قارسىلاستىڭ پايداسىنا شەشىلگەن.

69 كەلىدەگى ابىلايحان ءجۇسىپوۆ جارتىلاي فينالدا العان جاراقاتىنا بايلانىستى اقتىق سىنعا شىققان جوق. وسىلايشا، اۆتوماتتى تۇردە كۇمىس مەدال يەلەندى.

91 كەلىدەگى ۆاسيلي لەۆيت رەسەيلىك سادام ماگومەدوۆكە 1:4 ەسەبىمەن جول بەردى.

وسىلايشا، قازاقستان كومانداسى بولگارياداعى تۋرنيرگە نەگىزگى قۇراممەن قاتىسىپ، بەس كۇمىس ولجالاپ قايتقان.