مىسىردا توعىز ادامدى دارعا استى

استانا. قازاقپارات - مىسىر بيلىگى سارسەنبى كۇنى 2015 -جىلى ەلدىڭ باس پروكۋرورى حيشاما باراكاتتى ولتىرگەن توعىز ادامعا قاتىستى ۇكىمدى ورىندادى. بۇل تۋرالى «ال- حاداس» تەلەارناسى حابارلادى.

باس پروكۋروردى ءولتىرۋ ءىسى بويىنشا 67 ادامنان جاۋاپ الىنعان، ولاردىڭ 16 سىنا ىزدەۋ سالىنعان. 2017 -جىلدىڭ شىلدەسىندە 28 ايىپتالۋشى رەسپۋبليكانىڭ باس پروكۋرورىنا قارسى قاسكۇنەمدىككە دايىندالعانى جانە جۇزەگە اسىرعانى، سونداي- اق اتۋ قارۋىن، جارىلعىش زاتتاردى زاڭسىز ساقتاعانى ءۇشىن دارعا اسۋ ارقىلى ءولىم جازاسىنا كەسىلدى.

 حيشام باراكاتتىڭ كولىگىن 2015 -جىلى 29 - ماۋسىمدا قاساقانا جارعان ەدى. تۇراقتا تۇرعان كولىككە بومبا قويىلعانى انىقتالدى. باس پروكۋرور اۋىر حالدە اۋرۋحاناعا جەتكىزىلىپ، سوندا كوز جۇمدى.