فۋتبول: قازاقستان قۇراماسى مولدوۆانى جەڭە الا ما

استانا. قازاقپارات - بۇگىن فۋتبولدان قازاقستان قۇراماسى تۇركيادا وقۋ-جاتتىعۋ جيىنى بارىسىندا مولدوۆامەن جولداستىق كەزدەسۋ وتكىزەدى، دەپ حابارلايدى قازاقپارات ءتىلشىسى.

سوڭعى جىلداردا مولدوۆا الەمدەگى ءالسىز قۇرامالار قاتارىندا سانالادى. قاڭتار ايىنداعى ف ي ف ا رەيتينگىندە اتالمىش قۇراما 170-ورىندا تۇر. ايتا كەتەرلىگى، ولار 2008-جىلى اتالمىش رەيتينگتە 37-ورىنعا دەيىن كوتەرىلگەن بولاتىن. ال قازاقستان قۇراماسى قازىر ف ي ف ا رەيتينگىندە 117-ورىنعا جايعاسقان. ءبىزدىڭ قۇراما 2016-جىلى بۇگىنگە دەيىنگى ەڭ جوعارى كورسەتكىشى سانالاتىن 83-ورىندا بولعان ەدى.

قوس قۇراما بۇعان دەيىن 4 مارتە شەبەرلىك بايقاستى. ولاردىڭ بارلىعى - جولداستىق كەزدەسۋ ساناتىندا. ءبىر قىزىعى، ەكى قۇراما بۇگىنگى كۇنگە دەيىن بىردە-ءبىر مارتە رەسمي كەزدەسۋ وتكىزىپ كورمەگەن.

ويىنداردىڭ بارلىعى تۇركيانىڭ انتاليا قالاسىندا وتكىزىلدى. 2008-جىلدىڭ 6- اقپانىندا مولدوۆا فۋتبولشىلارى ءبىزدىڭ قۇرامانى 1:0 ەسەبىمەن جەڭدى. كەزدەسۋ تاعدىرىن مولدوۆالىق يگور بۋگايەۆ 13-مينۋتتا سوققان جالعىز گول شەشتى. ال 2010-جىلدىڭ 3-ناۋرىزىندا ءبىزدىڭ فۋتبولشىلار ولاردان ءدال وسى ەسەپپەن تاعى جەڭىلىپ قالدى.

بۇل جولى بۇگىنگى قارسىلاسىمىز ساپىنان الەكساندر ەپۋريانۋ مەرگەندىك تانىتتى. 2013-جىلدىڭ 6- اقپانىندا وتكەن كەزدەسۋدە قازاقستان قۇراماسى اتالمىش قارسىلاسىن 3:1 ەسەبىمەن تىزە بۇكتىردى. بۇل جولى ءبىزدىڭ قۇراما ساپىنان ۆيكتور دميتريەنكو 33-مينۋتتا ەسەپ اشسا، 59-مينۋتتا باۋىرجان جولشيەۆ ەسەپتى ۇستەمەلەي ءتۇستى. ال 86-مينۋتتا اناتولي دوروش ءبىر گول سوعىپ كەتتى. كەزدەسۋ نۇكتەسىن 90-مينۋتتا باۋىرجان جولشيەۆ قويدى. ال 2015-جىلدىڭ 18- اقپانىندا بولعان ويىن 1:1 ەسەبىمەن تەڭ اياقتالدى. اتالمىش كەزدەسۋدە ءبىزدىڭ قۇرامادان 48-مينۋتتا الەكەي شەتكين، مولدوۆادان 54-مينۋتتا الەكساندر گاتسكان گول سوقتى.

بيىل قازاقستان قۇراماسىنا جاڭا باپكەر كەلدى. بۇل قىزمەتكە چەح مامانى ميحال بيلەك تاعايىندالدى.

ول بۇگىنگى ويىندا نەگىزىنەن جاستارعا سەنىم ارتۋدى جوسپارلاپ وتىر.

بۇل ويىن فۋتبولدان 2020-جىلعى ەۋروپا بىرىنشىلىگىنىڭ ىرىكتەۋ كەزەڭى الدىنداعى ۇلتتىق قۇرامانىڭ دايىندىعى بولىپ تابىلادى. ەستەرىڭىزگە سالا كەتەلىك، ءبىزدىڭ قۇراما I توبىندا بەلگيا، رەسەي، شوتلانديا، كيپر، سان-مارينومەن سىنعا تۇسەدى.

قازاقستان فۋتبولشىلارى ىرىكتەۋ كەزەڭىندەگى العاشقى ويىنىندا 21- ناۋرىزدا شوتلانديا قۇراماسىن قابىلدايدى. ودان كەيىن 24- ناۋرىزدا استانادا رەسەي قۇراماسىمەن شەبەرلىك بايقاسادى.

ال مولدوۆا قۇراماسى H توبىندا باق سىنايدى. قارسىلاستارى - فرانسيا، يسلانديا، تۇركيا، البانيا، اندوررا قۇرامالارى. مولدوۆا قۇرامالارى العاشقى ويىنىندا 22- ناۋرىزدا فرانسيانى قابىلداسا، 25- ناۋرىزدا سىرت الاڭدا تۇركيامەن جاسىل الاڭعا شىعادى.

قازاقستان مەن مولدوۆا قۇرامالارى اراسىنداعى كەزدەسۋ استانا ۋاقىتىمەن 20:00 دە باستالادى.