ءبىر ادام پارامەن ۇستالسا، باسشىسىن جۇمىستان شىعارامىز - مينيستر

استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك ءوز قىزمەتكەرلەرىنە جەمقورلىق ءۇشىن جۇمىستان شىعاراتىن ەسكەرتتى، دەپ حابارلايدى قازاقپارات ءتىلشىسى.

«وتكەندە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆپەن كەزدەسكەندە ءبىز بىلاي كەلىستىك. ەگەر اۋماقتا ءبىر باسشى ۇستالسا، وندا وسى سالاعا جاۋاپتى كوميتەت ءتوراعاسى نەمەسە ونىڭ ورىنباسارى وتستاۆكاعا كەتۋى كەرەك. ءقازىر ءبىز اگەنتتىكپەن بىرلەسىپ جۇمىس ىستەپ جاتىرمىز. بالكىم، ورتاق ءبىر قۇجاتتى قابىلدايمىز. الايدا بۇدان بىلاي مەندە وسىنداي ۇستانىم بولادى. ماسەلەن، ءبىر سالانىڭ باسشىسى پارامەن ۇستالسا، كوميتەت ءتوراعاسىنىڭ ورىنباسارى جۇمىستا كەتۋى ءتيىس. ال جەرگىلىكتى جەردە ينسپەكتور قولعا تۇسسە، بىردەن دەپارتامەنت باسشىسى جۇمىستان كەتەدى»، - دەدى ج. قاسىمبەك بۇگىن استانادا وتكەن جيىندا.

ءمينيستردىڭ ايتۋىنشا، ونداي ۇستانىممەن باسشىلاردىڭ جەكە جاۋاپكەرشىلىگى ارتادى. سوندا جەرگىلىكتى جەردەگى قاراپايىم ينسپەكتوردان باستاپ كوميتەت باسشىلىعىنا دەيىنگى قىزمەتكەرلەر جەمقورلىقتىڭ جازاسىن تۇسىنەدى.

ج. قاسىمبەك ءوز جاۋاپكەرشىلىگىن دە اتاپ ءوتتى.

«بۇگىن مەن ۋادە بەرەمىن، ينسپەكتور پارامەن ۇستالسا، دەپارتامەنت ديرەكتورى جۇمىستان قۋىلادى. ال دەپارتامەنت باسشىسى ۇستالسا، كوميتەتتە وزگەرىستەر بولادى. ورتالىق اپپاراتتا دا سولاي بولادى. ونىڭ ءبارى ماعان دا قاتىستى»، - دەپ اتاپ كورسەتتى ج. قاسىمبەك.

ايتا كەتەيىك، بۇگىن ق ر يندۋستريا جانە ينفراقۇرىلىمدىق دامۋ مينيسترلىگىندە ورتالىق اپپارات پەن اۋماقتىق قۇرىلىمداردىڭ قىزمەتكەرلەرى جەمقورلىققا قارسى كۇرەس شارالارىمەن تانىستى. ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى وسى سالادا پارامەن ۇستالعانداردى كورسەتىپ، قىلمىستىق جازاعا تارتۋ جايىندا ايتىپ بەردى.

سول جەردە مينيستر ج. قاسىمبەك ءوز قىزمەتكەرلەرىنە ەسكەرتۋ جاسادى.

«ءبىز ءبىرقاتار شارالاردى قولعا الاتىن بولامىز. مەن وسىنى الدىن الا ايتىپ قويايىن. وسى جىلدىڭ ىشىندە كولىكتىك ينسپەكسيادا قايتا قۇرىلىمداۋ بولادى. وعان قاتىستى فۋنكسيالاردىڭ كوبىسى اۆتوماتتاندىرىلعان جۇيەگە اۋىستىرالادى. ءسويتىپ، جولدا تۇراتىن مامانداردى بارىنشا ازايتامىز. ادامدار جولدا تۇرمايدى. ال قالعان فۋنكسيالاردى باسقا مەملەكەتتىك ورگاندارعا بەرەمىز. ءسويتىپ، كولىكتىك ينسپەكتسيانى تۇبەگەيلى وزگەرتەمىز. سوندىقتان قازىر جىلدىڭ باسىندا ەسكەرتىپ قويايىن دەپ وتىرمىن. كولىكتىك ينسپەكتسيانى تولىعىمەن اتتەستاتسيادان وتكىزەمىز. ءبىز جەرگىلىكتى جەردە ينسپەكتورلاردىڭ سانىن 30-40 پروتسەنتكە قىسقارتۋدى جوسپارلاپ وتىرمىز. سول سەبەپتى جۇمىستى وزگەرتىڭىز. ايتپەسە، سىزدەرمەن قوشتاسامىز. باسقا قۇرىلىمدارعا دا ايتارىم وسى»، - دەپ اتاپ كورسەتتى ج. قاسىمبەك.