20:11, 20 - اقپان 2019 | GMT +6
دانيار ەلەۋسىنوۆتى الەمنىڭ ابسوليۋتتى چەمپيونى جاتتىقتىراتىن بولدى
استانا. قازاقپارات - تانىمال قازاقستاندىق بوكسشى دانيار ەلەۋسىنوۆتى كاسىبي بوكستا جارتىلاي ورتا سالماقتاعى بۇرىنعى ابسوليۋتتى الەم چەمپيونى كوري سپينكس جاتتىقتىراتىنى بەلگىلى بولدى.
بۇل تۋرالى بوكسشىنىڭ مەنەدجەرى زيا اليەۆ Sports.kz كە بەرگەن سۇحباتىندا ايتتى.
«دجون دجەكسوننىڭ جۇمىسباستىلىعىنا بايلانىستى جارتىلاي ورتا سالماقتاعى بۇرىنعى ابسوليۋتتى الەم چەمپيونى كوري سپينكستى شاقىرۋ تۋرالى شەشىم قابىلدادىق. مىقتى بوكسشىلاردىڭ ءبارى جاقسى جاتتىقتىرۋشى بولا بەرمەيدى جانە كەرىسىنشە. ەلەۋسىنوۆ كەلگەن العاشقى كۇننەن باستاپ كوري دانياردىڭ اكەسىمەن بىرگە ونى الداعى ايقاسقا دايىنداپ جاتىر. ءبىز جاتتىقتىرۋشى رەتىندە كىمدى تاڭدارىمىزدى بىلمەدىك، سوڭىندا كوريگە توقتالدىق»، - دەدى مامان.