توڭازىتقىش جايلى نە ءبىلۋ كەرەك؟

 استانا. قازاقپارات - توڭازىتقىش كەز كەلگەن اس ۇيدە ماڭىزدى ءرول اتقارادى.

ويتكەنى دەنساۋلىعىمىزعا ماڭىزدى ازىق- تۇلىكتىڭ بۇزىلماي ساقتالۋىن وسى توڭازىتقىش قامتاماسىز ەتەدى. توڭازىتقىش جايلى بارلىق سۇراقتارعا ساراپشى مامان جاۋاپ بەرەدى.

توڭازىتقىشتى قالاي تاڭداۋ كەرەك؟ تاڭداۋ كەزىندە اسحانانىڭ كولەمىنە مە، الدە ۇيدەگى ادام سانىنا نەگىزدەلۋ كەرەك پە؟

ارينە، ادام سانىن دا، اس ءۇي كولەمىن دە ەسكەرۋ كەرەك. وتباسى مۇشەلەرىنىڭ تالعامىنا دا كوپ نارسە بايلانىستى: قانشالىقتى ءجيى جانە قانداي ازىق- تۇلىكتەردى ساتىپ الاتىنىنا. ەگەر دايىن مۇزداتىلعان ونىمدەردى قالاسا - وندا مۇزداتقىشى ۇلكەن توڭازىتقىش العانى ءجون. دەرەۋ مۇزداتۋ فۋنكتسياسى بار توڭازىتقىشتار كوپ مولشەردەگى ازىق-تۇلىكتەردى تەز مۇزداتۋعا ارنالعان. تەمپەراتۋرا دەرەۋ -30 س-قا دەيىن ءتۇسىپ كەتەدى، بۇل ازىق-تۇلىكتەگى بارلىق دارۋمەندەردى ساقتاۋعا مۇمكىندىك بەرەدى. مۇزداتۋ پروتسەسى اياقتالا سالىسىمەن، دەرەۋ مۇزداتۋ فۋنكتسياسى ءوشىپ، مۇزداتقىش كامەرا قالىپتى رەجيمدە جۇمىسىن جالعاستىرادى، بۇل قۋاتتى ۇنەمدەۋگە سەپتىگىن تيگىزەدى.

قازىرگى تاڭدا مۋلتيزونالى توڭازىتقىش ءتيىمدى بولىپ تۇر. مۇندا قاجەتتى تەمپەراتۋرانى ءوزىڭ قوياتىندىقتان ول توڭازىتقىش رەتىندە دە، مۇزداتقىش رەتىندە دە جۇمىس ىستەيدى.

ەگەر وتباسى اپتاسىنا ءبىر رەت قانا بارىپ، مولىنان ازىق- تۇلىك الىپ قويۋدى قالاسا، وندا توڭازىتقىش تاڭداۋدا ازىق- تۇلىكتىڭ بالعىندىعىن ساقتايتىن ايماعىنىڭ نەمەسە نولدىك كامەرالى ايماعىنىڭ بولۋىنا نازار اۋدارۋ كەرەك. وندا مۇزداتۋدى قاجەت ەتپەيتىن ەت، بالىق، ءسۇت ونىمدەرى مەن ت. ب. تەز بۇزىلاتىن ونىمدەردى ساقتاۋعا قولايلى. بۇل ايماقتا تۇرعىلىقتى تەمپەراتۋرا - 0 س- تەن +3 س- كە دەيىن، دەمەك ازىق- تۇلىكتىڭ ورگانولەپتيكالىق قاسيەتى وزگەرمەيدى، بۇل بىرنەشە كۇن بويى ازىق- تۇلىكتى سول قالپىندا ساقتايدى.

ەگەر توڭازىتقىش ساتىپ الۋشى بەلسەندى ءومىر سۇرسە جانە ءاردايىم ءىسساپاردا نەمەسە قانداي دا ءبىر سەبەپتەرمەن ۇيدە كوپ بولمايتىن بولسا، وندا «دەمالىس» فۋنكسياسى بار توڭازىتقىش جارايدى. بۇل توڭازىتقىش ءبولىمىن وشىرە تۇرۋعا مۇمكىندىك بەرەدى، ياعني قۋاتتى ۇنەمدەۋدە اسا ماڭىزدى، ال مۇزداتىلعان ونىمدەر سول قالپىندا ساقتالىپ تۇرادى.

جانە، ارينە، توڭازىتقىش تاڭداعاندا اس ءۇيدىڭ كولەمىن دە ەسكەرۋ كەرەك: ءجۇرىپ- تۇرۋعا كەدەرگى كەلتىرمەي مە، ەسىگى ىڭعايلى اشىلا ما، ىشىنەن ازىق- تۇلىك الۋ ىڭعايلى ما جانە ت. ب. جالپى اس ۇيدە تەحنيكا «ۇشتىك» ۇلگىسى بويىنشا ورنالاسقانى دۇرىس: توڭازىتقىش - ىدىس جۋعىش - پليتا.

ەگەر توڭازىتقىش گۇرىلدەپ تۇرسا نە ىستەۋ كەرەك؟

بۇل توڭازىتقىشتىڭ دۇرىس ورناتىلماۋىنان بولۋى مۇمكىن. ىشىندەگى سورەلەر مەن وعان قويىلعان ازىق- تۇلىك دىرىلىنەن سونداي دىبىس شىعادى. ماسەلەنى شەشۋ ءۇشىن توڭازىتقىشتىڭ اياقتارىن دۇرىستاۋ قاجەت. جەكە تۇرعان توڭازىتقىش سونىمەن قاتار قابىرعاعا نەمەسە جيھازعا ءتيىپ تۇرماۋ كەرەك.

توڭازىتقىش تاڭداعاندا ونىڭ گۇرىلدەۋ- گۇرىلدەمەۋىن قالاي بىلۋگە بولادى؟

توڭازىتقىشتىڭ ءدىرىل دەڭگەيى ءارقاشان ونىڭ سايتتاعى سيپاتتاماسىندا جانە ءوندىرۋشى كاتالوگىندا كورسەتىلەدى. ول پايدالانىلاتىن كومپرەسسور مەن گۇرىل رەتتەۋ ماتەريالدارىنا بايلانىستى. جاقسى توڭازىتقىشتاردىڭ ۇلگىسىنە بايلانىستى گۇرىل دەڭگەيى 37-دەن 42 د ب- گە دەيىن جەتەدى. سالىستىرۋ ءۇشىن: اڭگىمەلەسۋ - 45 دەتسيبەلدى قۇرايدى.

ەگەر توڭازىتقىشتى سىرىپ العان بولسا نە ىستەۋ كەرەك؟

ەرەجە بويىنشا، توڭازىتقىشتىڭ سىرتقى قاباتى سىرىلمايتىن ماتەريالداردان جاسالادى. ەگەر سوعان قاراماستان سىرىلىپ قالسا، وندا ەمالدالعان توڭازىتقىشتى قايتا ەمالداۋ قاجەت، ال ەگەر ەسىگى پوليمەردەن جاسالعان بولسا - قايتا ىسىپ جىلتىراتۋ كەرەك. توڭازىتقىش وندىرۋشىلەرى مەن سەرۆيس ورتالىقتارى مۇنداي قىزمەتتەردى اتقارمايدى، ويتكەنى سىرىلىپ قالۋ كەپىلدىك جاعدايعا جاتپايدى.

كەيبىر ازىق- تۇلىكتەردى توڭازىتقىشقا سالار الدىندا قاپتاۋ كەرەك دەگەن راس پا؟

قاپتالماعان ونىمدەردىڭ بارلىعىن قاپتاپ سالعان ءجون. بىرىنشىدەن، بۇل توڭازىتقىشتىڭ تازالىعى ءۇشىن ماڭىزدى. ءيىسى قاتتى شىعاتىن تاعامداردى دا قاپتاۋ قاجەت. ىرىمشىكتى قاپتاماي سالسا، ءيىسى شىعىپ قانا قويماي، تەز كەۋىپ كەتەدى. جالپى قاپتاما ءونىمنىڭ تەز كەبۋىنىڭ الدىن الادى.

كەيبىر ازىق- تۇلىكتەردى توڭازىتقىشتا ساقتاماۋ كەرەك دەپ جاتادى (مىسالى، كارتوپتى). بۇل راس پا جانە نەگە؟

شىنىمەن، كەيبىر ازىق-تۇلىكتەردى توڭازىتقىشتا ساقتاۋ دۇرىس ەمەس. مىسالى، نان توڭازىتقىشتاعى بارلىق ءيىستى ءسىڭىرىپ الادى، ال جوعارى ىلعالدىلىقتان كوگەرىپ كەتۋى مۇمكىن. توڭازىتقىشتاعى كارتوپ ءدام تاتىپ كەتەدى، ويتكەنى +7 س جانە ودان تومەن گرادۋستا ونداعى كراحمال قانتقا اينالا باستايدى. قىزاناقتى دا توڭازىتقىشتا ساقتاماۋ كەرەك: ولار جىلى جەردى جاقسى كورەدى جانە توڭازىتقىشتا ءدامى وزگەرە باستايدى. پياز دا توڭازىتقىشتاعى جوعارى ىلعالدىلىقتان تەز بۇلىنەدى. بانان، اناناس پەن قاۋىن سۋىقتان قورقادى، سول سەبەپتى ولاردى دا توڭازىتقىشقا سالماۋ كەرەك.