ماڭعىستاۋلىق مۇگەدەك بالالاردىڭ ۇشاقپەن تەگىن جۇرۋىنە مۇمكىندىك جاسالادى
قازىرگى تاڭدا كۆوتا بويىنشا ەمدەۋ جانە وڭالتۋ ءىس- شارالارىنان ءوتۋ ءۇشىن رەسپۋبليكالىق ورتالىقتارعا باراتىن كەزدە مۇگەدەك بالا مەن اتا- اناسىنىڭ ءبىرىنىڭ تەمىر جول شىعىنىن وتەۋ قاراستىرىلعان. ماڭعىستاۋ وبلىسى ورتالىقتان شالعايدا ورنالاسقاندىقتان، دەنساۋلىق ساقتاۋ باسقارماسىنىڭ جولداماسى بويىنشا مۇگەدەك بالا مەن اتا- اناسىنىڭ بىرەۋىنىڭ ەكى باعىتتاعى ۇشاقپەن جول ءجۇرۋ قۇنىن (استانا جانە الماتى قالالارىنا) تولەۋ تۋرالى شەشىم قابىلداندى.
«بۇدان بولەك، رەسپۋبليكالىق كلينيكالاردا جانە وبلىس ورتالىقتارىندا دەنساۋلىق ساقتاۋ باسقارماسى كوميسسياسىنىڭ جولداماسى بويىنشا مامانداندىرىلعان مەديتسينالىق كومەك الۋ كەزىندە از قامتىلعان وتباسىلاردىڭ بارلىق بالالارىنا تەمىر جول كولىگىمەن جول ءجۇرۋ شىعىندارى وتەلەدى»، - دەدى وبلىس اكىمى ەرالى توعجانوۆ بۇگىنگى حالىققا ەسەپ بەرۋ كەزدەسۋىندە.
ءساۋىر ايىنان باستاپ كوپبالالى انالار قوعامدىق كولىكتە تەگىن جۇرۋگە مۇمكىندىك الادى.
«ۇستىمىزدەگى جىلدىڭ ءساۋىر ايىنان باستاپ اقتاۋ قالاسىنداعى قوعامدىق كولىكتە جانە «اقتاۋ - مۇنايلى اۋدانى» باعىتى بويىنشا اۋدانارالىق كولىك قاتىناسىندا، تامىزدان باستاپ جاڭاوزەن قالاسىنىڭ قوعامدىق كولىكتەرىندە كوپ بالالى انالار تەگىن جۇرەدى»، - دەدى ءوڭىر باسشىسى ەرالى توعجانوۆ.
ايتا كەتەيىك، بۇعان دەيىن شىمكەنت قالاسىنىڭ اكىمى عابيدۋللا ءابدىراحىموۆ ناۋرىز ايىنان باستاپ «التىن القا» جانە «كۇمىس القا» يەگەرلەرى مەن باتىر انالاردىڭ اۆتوبۋستا تەگىن جۇرەتىنىن ايتقان بولاتىن.
سونداي- اق، بيىلعى جىلدىڭ ەكىنشى توقسانىنان باستاپ ماڭعىستاۋلىق كوپ بالالى، از قامتىلعان وتباسىلارعا 100 مىڭ تەڭگە كولەمىندە ءبىرجولعى تولەم بەرىلەتىن بولدى. ودان بولەك، ماڭعىستاۋلىقتار قايتارىمسىز گرانتتار الا الادى.
«بيىل مۇگەدەكتەرگە، جەتىم بالالارعا جانە كوپبالالى، از قامتىلعان وتباسىلارعا ءوز بيزنەسىن اشۋ ءۇشىن كونكۋرستىق نەگىزدە 500 مىڭ تەڭگەگە دەيىن گرانتتار بەرە باستايمىز»، - دەدى ءوڭىر اكىمى.
اۆتور: ءلايلىم ءالىم