استانا ءتۇرلى دارىندار مەن تالانتتاردىڭ ورداسىنا اينالۋى كەرەك

استانا. قازاقپارات - استانا - ءتۇرلى دارىندار مەن تالانتتاردىڭ ورداسىنا اينالۋى كەرەك. بۇل تۋرالى بۇگىن قالا حالقىنىڭ الدىندا ەسەپ بەرىپ جاتقان استانا اكىمى باقىت سۇلتانوۆ ايتتى، دەپ حابارلايدى قازاقپارات ءتىلشىسى.

«قوعام تۇزەلۋى ءۇشىن ادام تۇزەلۋى كەرەك، دەيدى قازاق. ءار ادام ءوز قارىم-قابىلەتىنە ساي ونەر تابۋى، ومىرلىك ماقسات جولىندا ەرىنبەي ەڭبەك ەتۋى وتە ماڭىزدى. اسىرەسە كۇش-قايراتى تاسىعان، اقىل-ويى تولىسقان جاستارعا ارتار جۇك كوپ، ءۇمىت زور. بيىلعى 2019-جىل - ەلباسىمىزدىڭ باستاماسىمەن «جاستار جىلى» بولىپ جاريالاندى. جاس ادامنىڭ بويىنا ءتان قاسيەت - ماكسيماليزم. ەندەشە، 2019-جىل - قولعا الىنعان الەۋمەتتىك باعدارلامالاردى ماكسيمالدى تۇردە ىسكە اسىراتىن جىل. استانا تۇرعىندارىنىڭ ءومىرىن جاقسارتۋعا باعىتتالعان ناقتى قادامدارعا قورىقپاي بارىپ، مۇمكىندىكتەردى بارىنشا پايدالانۋىمىز كەرەك. ونىڭ ۇستىنە، ەلباسىمىز ءبىزدىڭ الدىمىزعا ناقتى تالاپتار قويىپ وتىر. استانا - ءتۇرلى دارىندار مەن تالانتتاردىڭ ورداسىنا اينالۋى كەرەك. بۇل ەلباسىمىزدىڭ ارتىپ وتىرعان مىندەتى»، - دەدى ب. سۇلتانوۆ.

وسى ورايدا اكىم جاقىندا جاستار ءىسى جونىندەگى كەڭەستىڭ جيىنىنا قاتىسقانىن اتاپ ءوتتى.

«وندا جاستارمەن پىكىرلەسىپ، ءتۇرلى مۇمكىندىكتەردى ەكشەدىك، ماڭىزدى باسىمدىقتاردى انىقتادىق. ءسويتىپ، ەلباسىمىزدىڭ بىزگە قويعان تالاپتارىنا ساي، «استانا جاستارى-2019» جول كارتاسىن ازىرلەدىك. قۇجاتقا ەنگەن شارالار جاستاردى دەمەپ جىبەرۋ، دۇرىس باعىتقا جەتەلەۋ جانە بويىنداعى تالانتىن تانىپ، تامىرىن جايۋىنا جاعداي جاساۋ»، - دەدى قالا باسشىسى.