قازاقستاننىڭ تەلەحابارلارى رەسەيدە كورسەتىلە باستادى

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆتىڭ ايتۋىنشا، قازاقستاننىڭ تەلەحابارلارى رەسەيگە تارالا باستادى.

اتالعان جۇمىستى اياقتاۋعا 15 جىل كەتتى، دەپ حابارلايدى قازاقپارات ءتىلشىسى.

«شەتەلدە تۇراتىن قازاقتارعا وتاندىق تەلەحابارلاردى جەتكىزۋ بويىنشا ءبىراز جۇمىستار اتقارىلدى. ماسەلەن، «حابار» اگەنتتىگى شەتەلدىك وكىلدىكتەرىن اشىپ، رەسەي فەدەراتسياسىنىڭ تەرريتورياسىندا حابار تاراتۋعا رۇقسات الدى. بۇدان بولەك، «حابار 24» ارناسىنىڭ سپۋتنيكتىك حابار تاراتۋدى باستالدى. ونىڭ سيگنالى «يامال 401» جەر سەرىگى ارقىلى تارالادى. دەمەك، اتالعان ارنا بارلىق كابەلدىك وپەراتورلاردا بار جانە ونى رەسەيدىڭ كەز كەلگەن جەرىندە كورۋگە بولادى. وسىنى ىسكە اسىرۋ ءۇشىن 15 جىلىمىز كەتتى»، - دەدى د. ابايەۆ مينيسترلىكتىڭ القا ماجىلىسىندە.

ايتا كەتەيىك، وتىرىستا داۋرەن ابايەۆ سيفرلىق تەلەحابارلارعا قوسىلاتىن وبلىستاردى اتادى. بىلتىر ەلىمىزدە انالوگتىق تەلە-راديو حابارلاردى تاراتۋدى كەزەڭ-كەزەڭىمەن توقتاتۋ جۇمىستارى باستالعان بولاتىن. بۇگىندە ءتورت ايماق - ماڭعىستاۋ، تۇركىستان، جامبىل وبلىستارى جانە شىمكەنت قالاسى تولىعىمەن سيفرلىق تەلەديدارعا كوشتى.

«وسىلايشا، اۋىلداعى اعايىن 15 وتاندىق تەلەارنانى، ال وبلىس ورتالىعىنىڭ تۇرعىندارى 30 ارنانى جوعارى ساپادا تاماشالاپ وتىر. بيىل ءبىز الماتى، پاۆلودار مەن قوستاناي ايماقتارىن سيفرلىق حابار تاراتۋعا اۋىستىرۋدى كوزدەپ وتىرمىز. وسى باعىتتاعى جۇمىستار 2022-جىلى تولىق اياقتالادى دەگەن جوسپارىمىز بار»، - دەدى د. ابايەۆ مينيسترلىكتىڭ القا ماجىلىسىندە. سپۋتنيكتىك تارەلكالار اۋىل تۇرعىندارىنا تەگىن بەرىلەدى.