اۋىل تۇرعىندارىنا سپۋتنيكتىك قابىلداعىشتار تەگىن بەرىلەدى - داۋرەن ابايەۆ

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ شالعاي جاتقان اۋىلداردى سيفرلىق تەلەديدارمەن قامتۋ جايىندا ايتتى، دەپ حابارلايدى قازاقپارات ءتىلشىسى.

مينيستردىڭ ايتۋىنشا، الەۋمەتتىك از قامتىلعان تۇرعىندارعا سيفرلىق تەلەۆيزياعا قاجەتتى ابونەنتتىك قۇرالدار تەگىن بەرىلەدى.

 « ال سيفرلىق سيگنالداردان شالعاي ورنالاسقان ەلدىمەكەندەر وتاندىق « TV OTAU » سپۋتنيكتىك قابىلداعىشتارىمەن (سپۋتنيكتىك تارەلكالار) قامتىلادى. ول ءۇشىن سول ايماقتىڭ جەرگىلىكتى بيۋدجەتىنەن قارجى بولىنگەن. سونىمەن قاتار، ءبىز بوس تۇرعان جيىلىكتەردى ۇيالى بايلانىس ساپاسىن ارتتىرۋ ماقساتىندا پايدالانامىز»، - دەدى د. ابايەۆ مينيسترلىكتىڭ القا ماجىلىسىندە.

ايتا كەتەيىك، وتىرىستا داۋرەن ابايەۆ سيفرلىق تەلەحابارلارعا قوسىلاتىن وبلىستاردى اتادى. بىلتىر ەلىمىزدە انالوگتىق تەلە- راديو حابارلاردى تاراتۋدى كەزەڭ- كەزەڭىمەن توقتاتۋ جۇمىستارى باستالعان بولاتىن. بۇگىندە ءتورت ايماق - ماڭعىستاۋ، تۇركىستان، جامبىل وبلىستارى جانە شىمكەنت قالاسى تولىعىمەن سيفرلىق تەلەديدارعا كوشتى.

 « وسىلايشا اۋىلداعى اعايىن 15 وتاندىق تەلەارنانى، ال وبلىس ورتالىعىنىڭ تۇرعىندارى 30 ارنانى جوعارى ساپادا تاماشالاپ وتىر. بيىل ءبىز الماتى، پاۆلودار مەن قوستاناي ايماقتارىن سيفرلىق حابار تاراتۋعا اۋىستىرۋدى كوزدەپ وتىرمىز. وسى باعىتتاعى جۇمىستار 2022 - جىلى تولىق اياقتالادى دەگەن جوسپارىمىز بار»، - دەدى د. ابايەۆ مينيسترلىكتىڭ القا ماجىلىسىندە.

اۆتور: ارمان اسقاروۆ