باۋىرجان بايبەك: كوپبالالى وتباسىلاردىڭ بالالارى بالاباقشاعا تەگىن بارادى

الماتى. قازاقپارات - الماتىدا تۇرمىسى تومەن وتباسىلار ءۇشىن ەكىنشى بالاسىنان باستاپ بالاباقشا تەگىن بولادى. بۇل تۋرالى الماتى اكىمى باۋىرجان بايبەك تۇرعىندار الدىنداعى جىل سايىنعى ەسەپتى كەزدەسۋ كەزىندە جاريالادى، دەپ حابارلايدى قازاقپارات ءتىلشىسى.

 قالا باسشىسى سوڭعى ەكى اپتا ىشىندە 600-دەن استام انامەن ونداعان كەزدەسۋ وتكەنىن اتاپ ءوتتى.

«جۇزدەگەن وتىنىشتەر سارالاندى، ەڭ وتكىر ماسەلەلەر - تۇرعىن ءۇي، كوممۋنالدىق قىزمەت تولەمى، وقۋ مەن جۇمىسقا ورنالاسۋ. بارلىق وتىنىشتەر، اتاۋلى الەۋمەتتىك كومەك ءادىسىنىڭ وزگەرىسىن قوسا ۇكىمەت جانىنداعى جۇمىس توبىنا جىبەرىلدى. اكىمدىك دەڭگەيىندە دە قوزعاۋشى كۇشتەر مەن رەسۋرستار بار، سوندىقتان ءبىز ءبىرقاتار كەشەندى شارالاردى جاسادىق»، - دەدى اكىم.

سونىمەن قاتار، قالا باسشىسى كوپبالالى نەمەسە مۇقتاج وتباسىلاردىڭ بالالارىن بالاباقشاعا تەگىن اپارۋعا مۇمكىندىگى بولاتىنىن ايتتى.

«وزدەرىڭىز بىلەسىزدەر، اتا- انالار بالاباقشاداعى بالانىڭ تاماعى ءۇشىن 18 مىڭ تەڭگە عانا تولەيدى، قالعان 27 مىڭ تەڭگەنى مەملەكەت سۋبسيديالاۋدا. تەك وتكەن جىلى مەملەكەتتىك تاپسىرىس بويىنشا بالا باقشاداعى 51 مىڭ ورىنعا 16 ميلليارد تەڭگە ءبولىندى. بيىل بۇل سوما 1,8 ميللياردقا ارتتى. ەگەر كوپبالالى تۇرمىسى تومەن وتباسىنىڭ ەكى جانە ودان دا كوپ بالاسى بالاباقشاعا باراتىن بولسا، وندا وتباسىلىق بيۋدجەت جۇكتەمەسى دە جوعارى بولادى. سوندىقتان «باقىتتى وتباسى» باعدارلاماسى اياسىندا تۇرمىسى تومەن وتباسىلاردىڭ ەكىنشى بالاسىنان باستاپ بالاباقشا تەگىن بولادى»، - دەدى باۋىرجان بايبەك.

ايتا كەتۋ كەرەك، قازىرگى كەزدە تۇرمىسى تومەن وتباسىلارداعى 14 مىڭنان استام بالاعا مەكتەپتەردە ىستىق تاعام بەرىلەدى.

3475 بالا مەكتەپ فورماسىمەن قامتىلعان، 2333 بالاعا قارجىلاي كومەك كورسەتىلەدى، 1050 بالاعا جازعى لاگەرلەرگە جولداما بەرىلدى.

اۆتور: گۇلميرا عوسمانالي