سولتۇستىك قازاقستان وبلىسىندا قار قالىڭ بولعاندىقتان جابايى اڭدار قولدان ازىقتاندىرىلىپ جاتىر

پەتروپاۆل. قازاقپارات - جابايى اڭدار اشتان قىرىلماۋ ءۇشىن سولتۇستىك قازاقستان وبلىسىنىڭ قورىقشىلارى ولاردى قولدان ازىقتاندىرۋعا كوشتى، دەپ حابارلايدى قازاقپارات ءتىلشىسى.

سولتۇستىك وڭىرلەردەگى ۇزاق، ءارى ايازدى قىستا جابايى اڭدارعا ازىق تابۋ قيىن. بيىل بۇرىنعىدان قار قالىڭ ءتۇستى. ومبى قارمەن ءجۇرىپ شارشايتىن اڭدار ازىقسىز قالۋى مۇمكىن. قورىقتاعى جانۋارلاردى كوكتەمگە امان جەتكىزۋ ءۇشىن قورىقشىلار ولارعا كومەككە كەلدى. ەسىل اۋدانىنداعى «كراسنىي بور» جانۋارلار دۇنيەسىن قورعاۋ جانە ءوسىمىن مولايتۋ مەملەكەتتىك مەكەمەسى اۋماعى 60 مىڭ گەكتاردان استام جەردى باقىلايدى. بۇل قورىقتا جابايى جانۋارلاردىڭ ون شاقتى ءتۇرى مەكەندەيدى. مەكەمە قىزمەتكەرلەرى اڭدارعا ارناپ ارنايى ازىقتاندىرۋ الاڭدارىن ازىرلەگەن.

 «مارالدىڭ عانا سانى ءبىزدىڭ مەكەمە اۋماعىندا مىڭعا جەتتى. ولار اشتان ولمەۋى ءۇشىن وسى كەزدە ءبىز قولدان قورەكتەندىرۋدى باستايمىز. قالىڭ قاردىڭ استىنان ازىق تابۋ وڭاي ەمەس. ول ءۇشىن ورمان ىشىنە 13 استاۋ قويدىق، 5 ازىقتاندىراتىن الاڭىمىز بار»، - دەيدى مەكەمەنىڭ اعا قورىقشىسى ۆيكتور كروتەنكو.

قورىق اۋماعىندا جابايى اڭداردىڭ 10-عا جۋىق ءتۇرى مەكەن ەتەدى. مارالداردان باسقا، ەلىك، دوڭىز، بۇعى، قويان، تۇلكى كەزدەسەدى. ولارعا قىسقا قاجەتتى جەم ازىق پەن قايىڭ سىپىرعىشتارىن ورمان مەكەمەلەرىنىڭ قورىقشىلارى جاز بويى ازىرلەيدى. بۇدان باسقا جەم- ءشوپ تە كوپتەپ دايىندالادى.

 «قار جامىلعىسى وتە قالىڭ بولعان كەزدە قوسىمشا ازىق بەرۋ قاجەت. جانۋارلاردىڭ ازىققا ەمىن- ەركىن جەتۋى ءۇشىن جولداردى قاردان ارشيمىز. بىلتىر جازدا 35 مىڭ سىپىرعىش، جەتكىلىكتى مولشەردە ءشوپ پەن تۇز ازىرلەدىك»، - دەيدى س ق و تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ءبولىم باسشىسى ەرلان ءتاشىموۆ.

ادەتتە اڭدار قار كەتكەنشە دەيىن قولدان ازىقتاندىرىلادى ەكەن.

اۆتور: اقەركە داۋرەنبەك قىزى