فۋتبول: «قايسار» گرۋزيا چەمپيونىمەن تەڭ ءتۇستى

قىزىلوردا. قازاقپارات - قىزىلوردانىڭ «قايسارى» تۇركياداعى وقۋ-جاتتىعۋ جيىنى بارىسىندا گرۋزيانىڭ «سابۋرتالو» كومانداسىمەن كەزدەستى، دەپ حابارلايدى قازاقپارات ءتىلشىسى.

«سابۋرتالو» كلۋبىنىڭ قۇرىلعانىنا بيىل جيىرما جىل تولادى. ۇزاق جىلدار بويى سول ەل بىرىنشىلىگىنىڭ تومەنگى ليگاسىندا ويىن كورسەتىپ كەلدى. سوڭعى التى جىلدا ءبىرىنشى جانە جوعارى ليگاسىندا باق سىناپ ءجۇر. بىلتىر ەل چەمپيونى اتاعىن جەڭىپ الدى.

بۇگىندە كوماندا قۇرامىندا نەگىزىنەن جەرگىلىكتى جاستار ويىن كورسەتەدى. دەسە دە ولار وزدەرىمەن كەزدەسكەن ءاربىر كومانداعا لايىقتى دەڭگەيدە قارسىلىق كورسەتە الادى.

كەزدەسۋدە «قايسار» ويىن تىزگىنىن ءوز قولىنا الۋعا تىرىستى. وعان گرۋزيا چەمپيونى تەگەۋرىندى قارسىلىعىن ءبىلدىردى. ءبىرىنشى كەزەڭدە ەكى كوماندا دا ءبىر-ءبىرىنىڭ قاقپاسىنا گول سوعا العان جوق.

ەكىنشى كەزەڭدە قوس كوماندا قارسىلاستى قاپى قالدىراتىن مۇمكىندىكتەردى قاراستىردى. مۇنداي بەلسەندىلىك «قايسار» تاراپىنان ءجيى بايقالدى. سونىڭ سالدارىنان 49-مينۋتتا «سابۋرتالو» ويىنشىلارى ءوز ايىپ الاڭىندا دورەكى قيمىلىمەن كوزگە ءتۇستى. تورەشى ولاردىڭ قاقپاسىنا 11 مەترلىك ايىپ دوبىن بەلگىلەدى. اتالمىش پەنالتيدى قىزىلوردالىق فۋتبولشى اسحات تاعىبەرگەن ءمۇلت جىبەرگەن جوق. كوماندا بۇل ەسەپتى ويىن سوڭىنا دەيىن ۇستاپ تۇرا العان جوق. كەزدەسۋدىڭ 64-مينۋتىندا ۆلاديمير دۆاليشۆيلي تارازى باسىن تەڭەستىرىپ كەتتى. ويىن 1:1 ەسەبىمەن تەڭ اياقتالدى.

ەسكە سالا كەتەلىك، كەشە تۇسكە دەيىن قىزىلوردالىق كلۋب بولگاريانىڭ «تسارسكو سەلو» كومانداسىنا ەسە جىبەرگەن ەدى. ودان بۇرىن ۋكراينانىڭ «دەسنا» جانە رەسەيدىڭ «كرىليا سوۆەتوۆ»، گرۋزيالىق ۆ ي ت- «دجوردجيا» كومانداسىنان جەڭىلىپ قالعان ەدى.

ەندى «قايساردىڭ» وقۋ-جاتتىعۋ جيىنىندا ءبىر ويىنى قالدى. ونى 21- اقپاندا تۇركىمەنستاننىڭ «التىن اسىر» كومانداسىنا قارسى وتكىزەدى.