ۇكىمەت باسشىسى «جۋسان» وپەراتسياسى تۋرالى فيلم تۇسىرۋگە پىكىر ءبىلدىردى
بۇل جايىندا ءماجىلىس دەپۋتاتتارىنىڭ رەسمي ساۋالىنا بەرىلگەن ق ر پرەمەر-ءمينيسترى باقىتجان ساعىنتايەۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«بۇگىنگى تاڭدا «قازاقستان» رەسپۋبليكالىق تەلەراديوكورپوراتسياسى» اكسيونەرلىك قوعامى مادەنيەت جانە سپورت مينيسترلىگىمەن جانە مۇددەلى مەملەكەتتىك ورگاندارمەن بىرلەسىپ، جوعارىدا كورسەتىلگەن «جۋسان» وپەراتسياسى تۋرالى شىتىرمان وقيعالى، كوركەم- دەرەكتى، پارتيوتتىق فيلم شىعارۋ جونىندەگى ماسەلەنى پىسىقتاۋدا. سونىمەن قاتار مۇنداي فيلمدى جاساۋ بەلگىلى ءبىر ەلدەردىڭ قاتىسۋىنا بايلانىستى ءبىرقاتار ەلەۋلى ماسەلەنى قوزعايدى جانە مۇقيات پىسىقتاۋدى تالاپ ەتەدى. ياعني، جوسپارلانىپ وتىرعان كينوجوبانىڭ سيۋجەتتىك جەلىسىن قۇرۋ ءۇشىن سيريا اۋماعىنداعى ايقاس ورتاسىندا قالعان ءبىزدىڭ وتانداستارىمىزدى شىعارۋ اكسياسىن ەتكىزۋگە سەبەپ بولعان ءمان-جايلاردى كورسەتۋ قاجەت»، - دەپ اتاپ وتەدى ۇكىمەت باسشىسى.
ونىڭ اتاپ وتۋىنشە، 2019 -جىلعى 6 -قاڭتاردا ۇلتتىق قاۋىپسىزدىك كوميتەتى، ىشكى ىستەر مينيسترلىگى جانە قورعانىس مينيسترلىگى «جۋسان» اتاۋىمەن جۇرگىزگەن ارنايى وپەراتسيانىڭ ناتيجەسىندە سيريادان قازاقستاننىڭ 47 ازاماتى، ونىڭ ىشىندە 30 بالا ەلگە جەتكىزىلدى. قازاقستاننىڭ حالىقارالىق تەرروريزمگە قارسى كۇرەس ىسىندە جۇرگىزىپ جاتقان بەلسەندى سىندارلى سىرتقى ساياسي جۇمىسىنىڭ نەگىزىندە وسى گۋمانيتارلىق وپەراتسيا بىرنەشە ايدىڭ ىشىندە مەملەكەت باسشىسىنىڭ جوعارى بەدەلىنىڭ ارقاسىندا جۇرگىزىلدى جانە ازىرلەندى. قازاقستاندىق ازاماتتار سيريا اۋماعىندا «سيريالىق دەموكراتيالىق كۇشتەرگە» ءوز ەركىمەن بەرىلدى جانە قازاقستاندىق ارنايى قىزمەتتەر مەن اسكەري ترانزيتتىڭ قاتىسۋىمەن ءۇشىنشى ەلدەر ارقىلى قازاقستانعا شىعارىلدى.
«سىرتقى ىستەر مينيسترلىگىنىڭ اقپاراتى بويىنشا وتانداستارىمىزدىڭ ەلگە ورالۋ پروتسەسى ءالى كۇنگە دەيىن اياقتالماعان. وسىعان بايلانىستى، قاۋىپسىزدىك ماقساتىندا وسى توپتىڭ تابىلۋى مەن شىعارىلۋىنىڭ جاي-جاپسارى اشىلمايدى. ءوز كەزەگىندە جاستاردىڭ پاتريوتتىق جانە رۋحاني تاربيەسىنە وڭ اسەر ەتەتىن ساپالى فيلم دايىنداۋ ماقساتىندا بۇل ماسەلەنى ەگجەي- تەگجەيلى زەرتتەپ جانە مۇقيات پىسىقتاۋ قاجەت. وسىعان بايلانىستى، مادەنيەت جانە سپورت مينيسترلىگىنە مۇددەلى مەملەكەتتىك ورگاندارمەن بىرلەسىپ وسى ماسەلەنى تالقىلاۋ جانە كوتەرگەن ماسەلە بويىنشا جان- جاقتى تالداۋ جۇرگىزۋ تاپسىرىلدى»، - دەدى ب. ساعىنتايەۆ.
ەستەرىڭىزگە سالا كەتسەك، 9 -قاڭتاردا ەلباسى نۇرسۇلتان نازاربايەۆ سيريادان قازاقستان ازاماتتارىن ەۆاكۋاتسيالاۋ بويىنشا گۋمانيتارلىق وپەراتسياعا بايلانىستى مالىمدەمە جاسادى. وندا مەملەكەت باسشىسى قۇقىق قورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان 47 ازاماتىمىز، سونىڭ ىشىندە 30 بالا ەلىمىزگە قايتارىلعانىن اتاپ ءوتتى.
وسىدان كەيىن پارلامەنت ءماجىلىسىنىڭ دەپۋتاتى قۋانىش سۇلتانوۆ «جۋسان» وپەراتسياسى نەگىزىندە دەرەكتى، پاتريوتتىق تاربيەدەگى كوركەم فيلم ءتۇسىرۋ تۋرالى ق ر پرەمەر-ءمينيسترى باقىتجان ساعىنتايەۆتىڭ اتىنا دەپۋتاتتىق ساۋال جولداعان ەدى.