تۇركىستان اۋماعىنداعى كۇلتوبە قالاشىعى قالپىنا كەلتىرىلمەك
بۇل تۋرالى مادەنيەت جانە سپورت مينيسترلىگىنىڭ القا وتىرىسىندا مينيستر ارىستانبەك مۇحامەدي ۇلى ءمالىم ەتتى، دەپ حابارلايدى قازاقپارات ءتىلشىسى.
«جوسپارعا سايكەس تۇركىستان قالاسىنىڭ بۋفەرلىك ايماعىنىڭ 88,7 گەكتارلىق اۋماعىندا 18 نەگىزگى ايماق تولىق رەستاۆراتسيالانىپ، قايتا قالپىنا كەلتىرىلەدى. ەڭ الدىمەن، جالپى اۋدانى 27 گەكتار بولاتىن تۇركىستان اۋماعىنداعى العاشقى قالالىق قونىستاردىڭ ءبىرى - كۇلتوبە قالاشىعى قايتا قالپىنا كەلتىرىلەتىن بولادى. وندا قوجا احمەت ياساۋي داۋىرىنەن قالعان 50-دەن استام عيماراتتى سالىپ، ابىلمامبەت حان قىستاعىنىڭ باستاپقى ءتۇرىن قالپىنا كەلتىرۋ كوزدەلگەن»، - دەيدى ارىستانبەك مۇحامەدي ۇلى.
ءمينيستردىڭ ايتۋىنشا، قوجا احمەت ياساۋي كەسەنەسىنىڭ (قازاندىق، گۋرحانا، باس پورتال، ۇلكەن اق-سارايدىڭ رەسمي قابىلداۋلار زالى) 11-12 -عاسىرداعى حيلۆەتتىڭ، چيلليا حانانىڭ، 15 -عاسىرداعى ورتاعاسىرلىق شىعىس مونشاسىنىڭ، رابيا سۇلتان بەگىم، ەسىم حان كەسەنەلەرىنىڭ رەكونسترۋكتسياسى جوسپارلانعان.
«كوشپەلى ءومىر سالتىن ۇستانۋ ءۇشىن ەتنواۋىل اشىلىپ، ىڭعايلى بولۋ ءۇشىن قونىس اۋماعى لاندشافتتى ارحيتەكتۋرامەن گۇلدەنەدى. وندا شەبەرلەر ورتالىقتارى، ۇلتتىق تاعامدار كورمەسى، كادەسىيلار ۇسىنىلىپ، ۇلتتىق ويىندار وتكىزىلەدى. كەلۋشىلەرگە ىڭعايلى بولۋ ءۇشىن بارلىق اۋماقتا جاياۋ جولدار، سۋ بۇرقاقتار، ساياباقتار ورنالاسادى. 2023 -جىلعا قاراي تۇركىستانعا كەلەتىن تۋريستەردىڭ سانى 5 ميلليون اسا ادامدى قۇرايتىن بولادى. ولاردىڭ كەلۋ ۋاقىتى دا 3 ساعاتتان 4-5 كۇنگە دەيىن ۇلعايادى»، - دەيدى مينيستر.