ەرمەك تۇرسىنوۆ: قازىر بۇكىل شوۋ-بيزنەس پەن انشىلەر كينوعا لاپ قويدى
«قازىرگى ۋاقىتتا بۇكىل شوۋ-بيزنەس، بۇكىل ك ۆ ن، انشىلەر كينوعا لاپ قويدى. ال مەن ولاردىڭ ونىمدەرىن بەس مينۋتتان ارتىق ۋاقىت قاراي المايمىن.
...جاقىندا ءبىر ۆاينەردىڭ (م. تورەبايەۆ) ۆيدەوسى الەۋمەتتىك جەلىدە تاراپ ءجۇر. بىرىنشىدەن، جالپى، ول ۆاينەر قالايشا ول مىنبەرگە تاپ بولدى؟ ەكىنشىدەن، ول ءبىر سوزىمەن بۇكىل كينەماتوگرافيستەر وداعىنا ءتىل تيگىزىپ وتىر. ول وداقتىڭ باسشىسى بولعاندىقتان، مەن قورعاعىم كەلەدى»، - دەيدى ەرمەك تۇرسىنوۆ استانادا وتكەن ق ر مادەنيەت جانە سپورت مينيسترلىگىنىڭ كەڭەيتىلگەن القا ماجىلىسىندە.
رەجيسسەردىڭ ايتۋىنا قاراعاندا، كينو تۋرالى تالقىلاناتىن بولسا، ەڭ الدىمەن اسانالى ءاشىموۆ سەكىلدى حالىق مويىنداعان ازاماتتاردى تىڭداۋ كەرەك.
«مەن سول ۆاينەرگە جاۋاپ بەرگىم كەلەدى. ءبارى ءبىر-بىرىمەن بايلانىستى. ءتۇسىرىلىپ جاتقانداردىڭ ءبارى كينو ەمەس. كىتاپ دۇكەنىنە ءتۇسىپ جاتقاننىڭ ءبارى دە ادەبيەت ەمەس بىلايشا ايتقاندا... كىتاپ دۇكەنىنە كىرسەڭ، مۇحتار اۋەزوۆ، مۇقاعاليلاردى كورەسىڭ. ءبىز مىندا ءبارىمىز - وبلىستىق مادەنيەت باسقارمالارىنىڭ باسشىلارىنىڭ ءبارى وتىرمىز. نە دەگىم كەلەدى: جاستارمەن كەزدەسۋ كەرەك. ادامداردى شاقىرۋ كەرەك. ولاردىڭ ءبارى دە الەۋمەتتىك جەلىدە. ءبىز بولساق، اڭگىمەنى وسىندا تالقىلاۋدامىز»، - دەيدى رەجيسسەر.
ەرمەك تۇرسىنوۆتىڭ ايتۋىنشا، قازىرگى زيالى قاۋىم وكىلدەرى جاستارمەن الەۋمەتتىك جەلى ارقىلى تىلدەسە ءبىلۋى كەرەك.
«مەنىڭ ويىمشا، ۇلت مادەنيەتى - جاستاردىڭ ءوز تاريحىنا كوزقاراسىمەن ولشەنەدى. وتكەنگە تاس اتۋعا بولمايدى. ول شاكەن ايمانوۆتى دا، سۇلتان قوجىقوۆتى دا ايامادى. ءبىزدى قويشى... بىزدە كينو بار. دارىندى جاستار جەتەرلىك. جانات الشانوۆ، ايدىن سالامات دەگەن مىقتى جاستار ءوسىپ كەلەدى. ولاردى ەشكىم تاني دا بەرمەيدى. سەبەبى، ولار ۇياڭ ءارى ەڭبەكقور»، - دەپ ءتۇيدى ءسوزىن رەجيسسەر.