ۇلىقبەك ەسداۋلەت: وسى جازدا ازيا ەلدەرى قالامگەرلەرىنىڭ ءبىرىنشى فورۋمىن وتەدى

 استانا. قازاقپارات - اقىن، قازاقستان جازۋشىلار وداعىنىڭ ءتوراعاسى، مەملەكەتتىك سىيلىقتىڭ يەگەرى ۇلىقبەك ەسداۋلەت وسى جىلدىڭ تامىز ايىندا ازيا ەلدەرى قالامگەرلەرىنىڭ ءبىرىنشى فورۋمى وتكىزىلەتىنىن جاريا ەتتى، دەپ حابارلايدى قازاقپارات ءتىلشىسى.

«مادەنيەت تۋرالى زاڭنىڭ اياسىندا «كينەماتوگرافيا تۋرالى» زاڭنىڭ قابىلدانعانى تۋرالى جاڭا ايتىلىپ كەتتى. ادامنىڭ قىزىعۋشىلىعىن وياتاتىن نارسە. كينو دەگەن شىنىن ايتقاندا دامۋى ءتيىس سالا. باياعىدا ءبىر زاماندا ادەبيەت دامىپ كەتىپ ەدى، ەندى كينومىز وزايىن دەپ تۇر. سوعان قىزىعا وتىرىپ، مەن قۇتتىقتاعىم كەلەدى. سونىمەن قوسا، ىشىمدەگى ءبىر ۇسىنىستى ايتا كەتسەم دەيمىن. مادەنيەت دەگەن زاڭنىڭ ىشىندە بىردە- ءبىر ادەبيەتكە قاتىستى باپ جوق. سونداي- اق بىزگە ءبىر جەكە زاڭنىڭ كەرەگى جوق، بىزگە تەك ءبىر باپ قانا ەنگىزىپ بەرسە، جاڭاعىداي قوسىمشا قۇن سالىعىنان قۇتىلىپ، قالاماقىمىز وسەر ەدى، ءبىزدىڭ دە جولىمىز اشىلار ەدى دەپ ويلايمىن» ، - دەدى ۇلىقبەك ەسداۋلەت استانادا وتكەن ق ر مادەنيەت جانە سپورت مينيسترلىگىنىڭ كەڭەيتىلگەن القا ماجىلىسىندە.

قازاقستان جازۋشىلار وداعىنىڭ ءتوراعاسى ءوز سوزىندە بيىل مادەنيەت جانە سپورت مينيسترلىگىمەن بىرلەسە وتىرىپ وتكىزىلەتىن شارالاردى اتاپ ءوتتى.

«ونىڭ ەڭ ۇلكەنى - 45  جىلدان بەرى وتپەگەن حالىقارالىق، دۇنيەجۇزىلىك دارەجەدەگى فورۋم. وسىدان 45 جىل بۇرىن كەڭەس زامانىندا، سوناۋ 1973 -جىلى ازيا- افريكا جازۋشىلارىنىڭ الماتىدا كونفەرەنسياسى وتكەن ەدى. ونى ءالى ءبىزدىڭ قالامگەرلەر دە، وقىرماندار دا اڭىز قىلىپ ايتادى. بيىلعى جىلى ءبىز سونىڭ ءبىر جالعاسىنداي، ازيا ەلدەرى قالامگەرلەرىنىڭ ءبىرىنشى فورۋمىن وتكىزگەلى وتىرمىز. بۇل - 14-21 - تامىز ارالىعىندا وتەدى. بۇل بيۋدجەتكە سالىنىپ، ماقۇلدانعان دۇنيە» ، - دەدى ۇلىقبەك ەسداۋلەت.

 اقىن ءوز سوزىندە سونىمەن قاتار بيىل جازۋشىلار وداعىنىڭ قۇرىلعانىنا 85  جىل، ساكەن سەيفۋللين، ءىلياس جانسۇگىروۆ پەن بەيىمبەت ءمايليننىڭ تۋعانىنا 125  جىل تولاتىنىن اتاپ ءوتتى.